Foto: Reuters
AQŞ bilıgı Venesuela jaǧalauynda «öte ülken» mūnai tankerın tärkılegenın resmi türde rastady. Būl turaly aldymen AQŞ prezidentı Donald Tramp Aq üide ötken brifingte mälımdedı, dep habarlaidy "Adyrna" portaly VVS-ge sıltep.
Tramptyŋ aituynşa, tankerdı ūstauǧa «öte maŋyzdy sebep» bolǧan, alaida ol egjei-tegjeiın aşpaudy jön kördı. Prezident jaqyn uaqytta operasiiaǧa qatysty fotomaterialdar jariialanatynyn da aitty.
Osydan keiın AQŞ-tyŋ bas prokurory Pem Bondi äleumettık jelıde qosymşa mälımet taratty. Onyŋ deregınşe, tanker bırneşe jyl boiy sanksiiaǧa ılıngen, sebebı ol «şeteldık terroristık ūiymdardy qoldaityn zaŋsyz mūnai tasymaldau jelısınıŋ bır bölıgı» retınde qarastyrylǧan.
Bondi FBR, Işkı qauıpsızdık ministrlıgı, AQŞ jaǧalau küzetı jäne Qorǧanys ministrlıgı bırlesıp, Venesuela men İrannan sanksiialanǧan mūnai tasymaldauǧa paidalanylǧan tankerdı tärkıleu turaly orderdı oryndaǧanyn habarlady. Operasiia «qauıpsız jäne sättı» jürgızılgen. Bas prokuratura oqiǧa sätınen qysqa videojazba da jariialady.
Vaşingtonnyŋ būl äreketı Karakastyŋ narazylyǧyn tuǧyzdy. Venesuela bilıgı arnaiy mälımdeme jasap, AQŞ prezidentın aiyptady. Resmi Karakas «Donald Tramptyŋ tüpkı maqsaty – venesuelalyq mūnaidy eşqandai ötemaqysyz iemdenu» ekenın atap körsettı.
Oqiǧa AQŞ pen Venesuela arasyndaǧy qarym-qatynasta jaŋa şielenıs tudyryp otyr. Tergeu jūmystary jalǧasuda.
