Almaty qalasynyŋ äkımı Darhan Satybaldy halyqtyŋ ömır süru sapasyn arttyruǧa jäne jastardy qoldauǧa baǧyttalǧan äleumettık infraqūrylymdy damytu boiynşa qabyldanyp jatqan şaralar turaly mälımdedı, dep habarlaidy «Adyrna» ūlttyq portaly.
Qala äkımınıŋ aituynşa, äkımdık eŋ aldymen bılım beru infraqūrylymyn damytuǧa basymdyq berıp otyr. 2025 jyly Almatyda 37,1 myŋ oquşyǧa arnalǧan 22 bılım beru nysany paidalanuǧa berıldı. Qabyldanyp jatqan şaralardyŋ nätijesınde aldaǧy oqu jylyna qarai oquşy oryndarynyŋ tapşylyǧy aitarlyqtai qysqarady dep kütılude.
Sonymen qatar, densaulyq saqtau salasyna bölınetın qarjy kölemı 2025 jyly 25 paiyzǧa artqan. Osyǧan bailanysty medisinalyq infraqūrylymdy jaŋǧyrtuǧa erekşe köŋıl bölınude. Biyl ekı alǧaşqy medisinalyq-sanitariialyq kömek körsetu ortalyǧy men bır emhana salyndy. Būdan bölek, 32 medisinalyq nysandy salu jäne jaŋartu jobalary pysyqtalyp jatyr. Jedel medisinalyq järdem qyzmetınıŋ avtoparkı 37 paiyzǧa jaŋartylyp, 50 jaŋa kölık satyp alyndy. Jyl basynan berı analar ölımı 48,2 paiyzǧa, näresteler ölımı 5,4 paiyzǧa, al qaterlı ısıkterden bolatyn ölım-jıtım 16 paiyzǧa tömendegen.
Darhan Satybaldynyŋ aituynşa, Almaty — jastar qalasy. Osyǧan orai, olardyŋ bılım aluyna, eŋbekke aralasuyna jäne qoǧamǧa beiımdeluıne erekşe nazar audaryluda. 2025 jyly qalada 11 komiuniti-ortalyq jäne 4 «Narko-STOP» ortalyǧy aşyldy. Sonymen qatar, 33 mektepten tys bos uaqytty tiımdı ūiymdastyru ortalyǧy jaŋǧyrtyldy. Studenttık jataqhanalarda 8 myŋnan astam tösek-oryn orny qūryldy.
«Almaty jastary» baǧdarlamasy aiasynda 2 200 otbasyǧa päter kıltterı tabystaldy. Qalada 3 sporttyq-sauyqtyru keşenı aşylyp, köşe sportyna arnalǧan 50 infraqūrylymdyq nysan salyndy. Qabyldanǧan keşendı şaralardyŋ nätijesınde NEET sanatyndaǧy jastardyŋ ülesı 8,3 paiyzdan 6,4 paiyzǧa deiın tömendedı.
Sondai-aq juyrda Almaty qalasyn damytudyŋ 2026–2030 jyldarǧa arnalǧan jospary qabyldandy. Atalǧan qūjat megapolistıŋ ornyqty damuyn qamtamasyz etuge baǧyttalǧan. Josparda tūrǧyndardyŋ ömır süru sapasyn arttyruǧa yqpal etetın negızgı basymdyqtar aiqyndalǧan. Atap aitqanda, kölık jüiesın keşendı damytu, qolaily qalalyq orta qalyptastyru, äleumettık tūraqtylyqty nyǧaitu, sifrlyq transformasiiany jedeldetu jäne qala qauıpsızdıgın arttyru basty baǧyttar retınde belgılengen.
