Premer-ministrdıŋ orynbasary jäne Mädeniet jäne aqparat ministrı Aida Balaeva körnektı öner qairatkerı Asanälı Äşımovtıŋ ömırden ozuyna bailanysty arnaiy jazba jariialady.
«Ardaqty aǧaiyn!
Ūlt ruhaniiatynyŋ abyz aqsaqaly, qazaq mädenietınıŋ alyp tūlǧasy Asanälı Äşımov aǧamyz kelmestıŋ kemesıne mınıp, baqiǧa attandy. Barşa alaş jūrtyna, aǧamyzdyŋ äuletı men aǧaiyn-bauyrlaryna, şäkırtterıne qaiǧyra köŋıl aitamyn.
Közı tırısınde-aq aŋyzǧa ainalǧan Asanälı aǧamyzben bırge tūtas bır däuır ötkendei. Erek talantymen, käsıbi şeberlıgımen qazaq önerın bır biıkke köterıp, qalyŋ qazaqtyŋ qadırlısıne ainaldy. Köpjyldyq eselı eŋbegı üşın Prezidentımızdıŋ qoldauymen «Qazaqstannyŋ Eŋbek Erı» atandy.
Men de aǧamyzben etene jaqyn aralasyp, syilas-syrlas boldym. Äkemnıŋ közın körıp, dämdes bolǧanyn jiı aityp otyratyn. Ainalasyna qamqor, kısılıgı men kışılıgın saqtaǧan, jüregı keŋ jan edı.
Bar ǧūmyryn qazaq teatry men kino önerınıŋ ösıp-örkendeuıne arnap, soŋynda sony soqpaq, öşpes ız qaldyrdy. Köptegen talantty jasqa qoldau körsetıp, ülgı-önege boldy.
Asyldardyŋ közındei, alyptardyŋ sözındei bolǧan öner qairatkerınıŋ jarqyn beinesı mäŋgı jadymyzda saqtalary sözsız.
Aǧamyzdyŋ jatqan jerı jaryq, topyraǧy torqa bolsyn! Ruhy peiışte şalqysyn!», — dep jazdy Balaeva.
