28 jeltoqsan künı Maŋǧystau oblysynyŋ Jaŋaözen qalasynda «Özenmūnaigaz» kompaniiasynyŋ belsendısı, būryn Mäjılıs deputattyǧyna kandidat bolǧan Mūratbai Jūmaǧaliev soqqyǧa jyǧyldy.
Maŋǧystau oblystyq densaulyq saqtau basqarmasynyŋ mälımetınşe, 28 jeltoqsan künı taŋǧy saǧat 04:10-da Jaŋaözen qalalyq auruhanasyna M.Jūmaǧaliev jetkızılgen. Auruhanaǧa tüsken kezde onyŋ jaǧdaiy öte auyr edı.
Aldyn ala qoiylǧan diagnozy: jabyq bas-mi jaraqaty, midyŋ şaiqaluy, maŋdai tūsy men bet aimaǧynda ekı jaqty köptegen syrylu jaraqattary bar. Jaǧdaiynyŋ auyrlyǧyna bailanysty nauqas jansaqtau bölımıne jatqyzyldy, dep habarlady Maŋǧystau oblystyq densaulyq saqtau basqarmasy.
Keiın nauqas travmatologiia jäne neirohirurgiia bölımıne auystyrylǧan. Qazırgı uaqytta onyŋ ömırıne qauıp tönıp tūrǧan joq.
Oqiǧa boiynşa polisiia qylmystyq ıs qozǧady. M.Jūmaǧalievtı özınıŋ tuysy soqqyǧa jyqqany anyqtaldy.
— Oqiǧa tüngı uaqytta Jaŋaözen qalasyndaǧy jeke tūrǧyn üilerdıŋ bırınde er adam men onyŋ tuysy (jienı) bırge spirttık ışımdık ışıp otyrǧan kezde bolǧan. Olardyŋ arasynda tūrmystyq janjal şyǧyp, arty töbeleske ūlasty. Nätijesınde er adam dene jaraqatyn alyp, auruhanaǧa jetkızıldı, — dep mälımdedı Maŋǧystau oblystyq polisiia departamentı.
Polisiia ökılderı alkogoldı şamadan tys tūtynu, agressiia körsetu, sondai-aq jeke jäne otbasylyq-tūrmystyq janjaldardy küş qoldanu arqyly şeşuge ūmtylu qoǧamǧa qauıptı äreket ekenın atap öttı. Olar mūndai qūqyq būzuşylyqtar üşın tuystyq deŋgeiıne nemese taraptardyŋ jeke qarym-qatynasyna qaramastan, zaŋ aldynda jauapkerşılık közdeletının jäne kınälı tūlǧalar qylmystyq jauapqa tartylatynyn eskerttı.
Mūratbai Jūmaǧaliev Jaŋaözen mūnaişylarynyŋ narazylyq aksiialaryn bırneşe ret ūiymdastyrǧan azamat retınde belgılı. 2023 jyly ol bır mandattyq okrug boiynşa Mäjılıs deputattyǧyna kandidat bolyp qatysty. Bıraq Edıl Jaŋbyrşinnen ūtylyp qalǧan bolatyn.
