Bügın, 24 qaŋtarda FlyArystan äuekompaniiasynyŋ Almaty – Oral baǧyty boiynşa FS7167 reisı ūşaq qūstarmen soqtyǧysty, dep habarlaidy “Adyrna”.
FlyArystan mälımetınşe, ūşaq Oral äuejaiyna qonǧan soŋ, injenerlık-tehnikalyq mamandar Astanadan jıberılıp, ūşaq pen onyŋ komponentterın tolyq tekserdı. Barlyq tekseru aiaqtalǧannan keiın ūşaq ekspluatasiiaǧa rūqsat alyp, 25 qaŋtarda saǧat 01:17-de Oral – Almaty baǧyty boiynşa qaita ūşyryldy.
"Keşıktırılgen reistıŋ jolauşylaryna ystyq susyndar men tamaq berılıp, 33 jolauşyǧa sūranys boiynşa qonaqüide ornalastyru qamtamasyz etıldı", dedı FlyArystan baspasöz qyzmetı.
Äuekompaniia jolauşylar men ekipajdyŋ qauıpsızdıgı – basty basymdyq ekenın atap öttı. Barlyq şara aviasiialyq qauıpsızdık pen tehnikalyq ekspluatasiia talaptaryna sai qataŋ oryndaldy.
