Memleket basşysy Qasym-Jomart Toqaev Qarjylyq monitoring agenttıgınde jiyn ötkızdı, dep habarlaidy «Adyrna» tılşısı.
Prezident sala mamandaryn käsıbi merekesımen qūttyqtap, osydan bes jyl būryn, el ışınde auqymdy özgerıster qolǧa alynyp jatqan tarihi kezeŋde qūrylǧan Qarjylyq monitoring agenttıgı özıne jüktelgen jauapkerşılık pen mındettı abyroimen oryndap kele jatqanyna nazar audardy.
Odan bölek, elde äleumettık salaǧa bölıngen qomaqty qarjynyŋ jymqyryluy men köleŋkelı ekonomikanyŋ älı de özektı mäsele bolyp otyrǧanyn aitty.
"Bız elımızdı damytuǧa arnalǧan qarajatty tiımdı jūmsaudyŋ amalyn ızdep qinalamyz. Bıraq soǧan qaramastan äleumettık salaǧa bölıngen trilliondaǧan teŋge qarjyny jymqyratyn alaiaqtar bar, tıptı, az emes dep aituǧa bolady. Būl – mülde aqylǧa syimaityn jaǧdai. Mūndai keseldı tüp-tamyrymen joiu kerek. Qarjyny kriptovaliutaǧa ainaldyryp, şetelge şyǧaru jaǧdailary da azaimai tūr, ondai zaŋsyzdyqqa tosqauyl qoiu qajet. Mūndai terıs ahual ekonomikaǧa orasan zor zardabyn tigızude. Tüptep kelgende, köleŋkelı ekonomikamen üzıldı-kesıldı küresu kerek. Būl da – öte özektı, asa maŋyzdy mındet. Qarjylyq monitoring qyzmetınıŋ aldynda tūrǧan mındet belgılı: būl – memleket qarjysynyŋ tek qana el igılıgıne jūmsaluyn qadaǧalau. Osy maŋyzdy mındettıŋ sapaly ıske asuy sızderdıŋ qyzmetterıŋızge tıkelei bailanysty", – dedı memleket basşysy.
