Prezident Qasym-Jomart Toqaev pen Päkıstan premer-ministrı Şahbaz Şarif ekı el arasynda strategiialyq serıktestık ornatu turaly bırlesken deklarasiiaǧa qol qoidy. Būl turaly bügın, 4 aqpanda Aqorda jazdy, dep habarlaidy «Adyrna» tılşısı.
Memleket basşysy halyqaralyq sahnadaǧy bedelı biık bauyrlas Päkıstanǧa kelgenıne quanyşty ekenın jetkızdı.
«Päkıstan – Qazaqstannyŋ Oŋtüstık Aziiadaǧy jäne odan tysqary jerlerdegı senımdı ärı maŋyzdy serıktesı. Halyqtarymyzdy Ūly Jıbek jolynan bastau alǧan taǧdyrly bailanys pen mädeni-ruhani sabaqtastyq jalǧap keledı. Bügın qadırlı premer-ministr myrzamen tarihi qūjatqa – Qazaqstan men Päkıstan arasynda strategiialyq serıktestık ornatu turaly bırlesken deklarasiiaǧa qol qoidyq. Būl qūjat özara bailanystardy jaŋa deŋgeige köteruge, sondai-aq ekıjaqty jäne köpjaqty kün tärtıbınıŋ barlyq spektrı boiynşa yntymaqtastyqty keŋınen damytuǧa jol aşady. Elderımız arasyndaǧy dostyq qatynastardy jäne özara tiımdı yqpaldastyqty tereŋdetuge Päkıstan Premer-ministrı Şahbaz Şarif aitarlyqtai zor üles qosty. Sol üşın oǧan alǧys aitamyn»,- dedı ol.
Qasym-Jomart Toqaev Şahbaz Şariftı elın alǧa batyl bastaǧan köregen köşbasşy dep atady. Onyŋ keleşekke baǧdarlanǧan saliqaly saiasat jürgızuınıŋ arqasynda İslamabadtyŋ aimaqtaǧy jäne älemdegı bedelı jyldan jylǧa artyp keledı.
«Byltyr Päkıstan Bırıkken Ūlttar Ūiymy Qauıpsızdık keŋesınıŋ tūraqty emes müşesı bolyp sailandy. Eldıŋ syndarly ärı jauapty qadamdary aimaqtaǧy beibıtşılık pen tūraqtylyqty nyǧaituǧa septıgın tigızdı. Päkıstannyŋ ekonomikalyq äleuetı zor, önerkäsıptık bazasy damyǧan, kölık-tranzit mümkındıkterı mol. Päkıstannyŋ auyl şaruaşylyǧy, jeŋıl önerkäsıbı, medisina önımderı halyqaralyq naryqta keŋınen taralǧan. Äskeri-önerkäsıptık keşenınıŋ serpındı damuy älemdık deŋgeide tanylǧan. Dostas halyqtyŋ türlı salalardaǧy ärbır jetıstıgıne şyn jürekten rizamyz, sızderge ärdaiym tılekşımız»,-dedı Qazaqstan prezidentı.
Aita keteiık, kelıssözder barysynda sauda-ekonomikalyq bailanystarǧa, investisiialarǧa jäne kölık-logistikalyq özara bailanysqa erekşe nazar audaryldy.
