Bügın, 13 aqpan künı Aqtau qalasynda Maŋǧystau oblysynyŋ äkımı Nūrdäulet Qilybaidyŋ qatysuymen jylyna 100 myŋ şaqyrtuǧa qyzmet körsete alatyn, zamanau ülgıdegı Maŋǧystau oblystyq jedel jäne şūǧyl medisinalyq järdem stansiiasynyŋ ǧimaratynyŋ aşylu saltanaty öttı.
Saltanatty şaraǧa QR Bas prokurorynyŋ orynbasary Ǧabit Sadyrbekov, QR Densaulyq saqtau vise-ministrı Timur Mūratov, memlekettık organdardyŋ ökılderı, medisina salasynyŋ ardagerlerı men öŋır därıgerlerı qatysty.
Saltanatty jiynda oblys äkımı jinalǧandardy qūttyqtap, jaŋa nysannyŋ öŋır üşın maŋyzdylyǧyna toqtaldy.
«Äleumettık nysan Memleket basşysy Qasym Jomart Toqaevtyŋ tapsyrmasyna säikes, Bas prokuratura qaitarǧan aktivter esebınen jäne Densaulyq saqtau ministrlıgınıŋ qoldauymen salyndy. Būl – Maŋǧystau jūrtşylyǧy üşın ülken quanyş. Jaŋa ǧimarat jedel medisinalyq kömektıŋ qoljetımdılıgın arttyryp, tūrǧyndarǧa sapaly ärı uaqtyly qyzmet körsetuge mümkındık beredı. Aq halatty jandardyŋ qajyrly eŋbegı ärdaiym qūrmetke laiyq. Jaŋa nysan sızderdıŋ jūmystaryŋyzdy jeŋıldetıp, käsıbi mümkındıkterıŋızdı keŋeitedı dep senemın», – dedı Nūrdäulet Qilybai.
Zamanaui stansiia jylyna 100 myŋ şaqyrtuǧa qyzmet körsetuge arnalǧan. Ǧimarat ortalyqtandyrylǧan bırıkken dispetcherlık qyzmetpen, simuliasiialyq jäne oqu-praktikalyq ortalyqpen, sondai-aq 20 sanitarlyq avtokölıkke arnalǧan jyly garajben jabdyqtalǧan.
Sonymen qatar 2025 jyly Maŋǧystau oblysy äkımdıgınıŋ qoldauymen oblystyq jedel medisinalyq järdem stansiiasyna zamanaui medisinalyq jabdyqtarmen qamtylǧan 32 sanitarlyq avtokölık satyp alyndy. Būdan bölek «NCOC» kompaniiasynyŋ demeuşılık qoldauy aiasynda qosymşa 20 sanitarlyq avtokölık alyndy. Būl qoldau öŋır tūrǧyndaryna körsetıletın medisinalyq kömektıŋ qoljetımdılıgı men sapasyn arttyruǧa mümkındık beredı.
Būl nysan bıregeilıgı jaǧynan Astana qalasynan keiıngı ekınşı stansiia. Aldaǧy uaqytta elımızdıŋ barlyq öŋırınde osyndai ülgıdegı medisinalyq mekemeler salu josparlanyp otyr. Būl nysannyŋ basty erekşelıgı – mūnda därıgerlerdıŋ sapaly jūmys ısteuı üşın qajettı barlyq jaǧdai jasalǧan.
