Soŋǧy ekı jylda Qazaqstanda balalardyŋ qūqyqtaryn qorǧau baǧytynda 11 zaŋ men baǧdarlama qabyldandy, dep habarlaidy "Adyrna" ūlttyq portaly.
Sonymen qatar 158 naqty şarany qamtityn «Qazaqstan balalary» baǧdarlamasy ıske qosyldy. Būl turaly Qazaqstan Respublikasyndaǧy Bala qūqyqtary jönındegı uäkıl Dinara Zakieva Astanada ötken Silk Power 2026 alaŋynda habarlady.
Zakieva balalardyŋ qauıpsızdıgın qamtamasyz etu, aldyn alu jüiesın damytu jäne otbasylardy qoldau şaralary turaly aityp öttı.
"Memleket basşysynyŋ tapsyrmasyna säikes, soŋǧy ekı jylda balalardyŋ qauıpsızdıgın qamtamasyz etuge, aldyn alu jüiesın damytuǧa jäne otbasylar men balalarǧa kömek körsetuge baǧyttalǧan 11 negızgı zaŋ men baǧdarlama qabyldandy", — dedı ol.
Sonymen qatar öŋırlerde äkımdıkter janynan balalardyŋ qūqyqtaryn qorǧau basqarmalary qūrylyp jatyr. Mamandardy oqytu jäne jüienı jetıldıru jūmystary da jalǧasuda.
Ombudsmennıŋ aituynşa, būl jūmystyŋ naqty nätijesı bar.
"Ötken jyldyŋ özınde qūzyrly organdar balalardyŋ qauıpsızdıgıne qatysty 50 myŋnan astam jaǧdaidy anyqtady. Otbasylarǧa jan-jaqty kömek körsetılıp, balalarǧa qūqyqtyq qorǧanys qamtamasyz etıldı", — dedı Zakieva.
