Foto: Qov.kz
Äleumettık jelılerde Astana köşelerınde jürıp bara jatqan zenittık zymyran keşenı tüsırılgen video tarady. Kadrlar jelı qoldanuşylary arasynda qyzu talqylau tudyrdy, dep habarlaidy “Adyrna” portaly Liter.kz saityna sıltep.
Oqiǧaǧa qatysty Qorǧanys ministrlıgı tüsınıkteme berdı. Vedomstvonyŋ mälımetınşe, äskeri tehnikanyŋ qala köşelerımen qozǧalysy josparly jauyngerlık daiyndyq şaralarynyŋ bır bölıgı.
Ministrlık ökılderınıŋ aituynşa, qazırgı uaqytta äue şabuylyna qarsy qorǧanys bölımşelerı oqu-jattyǧu ötkızıp jatyr. Onyŋ barysynda äskeri tehnikany basqaru, jedel ornalastyru jäne jauyngerlık tapsyrmalardy oryndau daǧdylary pysyqtalady.
Qorǧanys ministrlıgı mūndai jattyǧular Qaruly küşterdıŋ bekıtılgen daiyndyq josparyna säikes tūraqty türde ötkızıletının atap öttı.
Sondai-aq vedomstvo BAQ pen äleumettık jelı qoldanuşylaryn tekserılmegen aqparat taratpauǧa jäne tek resmi derekközderge süienuge şaqyrdy.
