Qazaqstanda uaqytşa tūruǧa berıletın rūqsattardy qoldan jasauǧa bailanysty ırı qylmystyq ıs tergelude. Istı Qazaqstan Ūlttyq qauıpsızdık komitetı jürgızıp jatyr. Tergeu aiasynda kuäger retınde Reseidıŋ äskerge şaqyru jasyndaǧy ondaǧan azamaty jauap berude. Būl turaly «Slovo zaşity» jobasy jariialady, dep habarlaidy "Adyrna".
Jobanyŋ mälımetınşe, tergeu barysynda adamdardy top-toppen, 3-4 adamnan şaqyryp, jauap alu jürgızılude. Qūqyq qorǧauşylardyŋ pıkırınşe, ıstıŋ köşı-qon polisiiasy emes, arnaiy qyzmetterdıŋ baqylauynda boluy onyŋ auqymdy boluy mümkın ekenın körsetedı.
Resmi türde būl ıs saiasi emes qylmystyq ıs retınde qarastyrylyp otyr. Degenmen qūqyq qorǧauşylar mūndai tergeu Reseiden kelgen keibır azamattarǧa qatysty deportasiia şaralary küşeiuı mümkın degen boljam aitady. Olardyŋ pıkırınşe, jalǧan UTR-ǧa qatysty ıs reseilık emigranttardy elden şyǧaruǧa formaldy negız retınde qoldanyluy yqtimal.
Qazaqstanda uaqytşa tūruǧa rūqsat şetel azamattaryna elde bır jylǧa deiın tūruǧa mümkındık beredı. Bıraq ony alu üşın jūmysqa ornalasu jäne tūrǧylyqty mekenjai boiynşa tırkelu qajet. Osy räsımnıŋ ainalasynda jalǧan qūjat daiyndaityn deldaldar naryǧy qalyptasqany aitylady. Keibır Resei azamattary däl osyndai qyzmetterdı paidalanǧan.
Sonymen qatar soŋǧy jyldary Qazaqstanda Reseide saiasi ıster boiynşa ızdeude jürgen azamattardyŋ ūstalu jaǧdailary da tırkelgen. Mysaly, 25 jastaǧy reseilık Aleksandr Kachkurkin aqpan aiynda Qazaqstannan deportasiialanǧan. Qūqyq qorǧauşylardyŋ aituynşa, ol Reseige jetkızılgen kezde oǧan qamauǧa alu turaly order berılgen.
Sondai-aq Qazaqstan Mäskeudıŋ bırneşe ekstradisiia sūranysyn qanaǧattandyrǧan. Olardyŋ qatarynda Aleksei Navalnyi ştabynyŋ būrynǧy qyzmetkerı Iýliia Emelianova jäne Ramzan Qadyrovty synaǧan Mansur Movlaev bar. Al Qazaqstan soty Resei Qaruly küşterınıŋ 15-şı motojauyngerlık brigadasynyŋ aǧa leitenanty Evgenii Korobovqa saiasi baspana beruden bas tartqan.
Osyǧan bailanysty äleumettık jelıler men keibır aqparat qūraldarynda Qazaqstan antisoǧys közqarastaǧy reseilıkterdı jappai deportasiialauǧa daiyndalyp jatyr degen aqparat tarady.
Alaida Qazaqstan Respublikasy Syrtqy ıster ministrınıŋ bırınşı orynbasary Erjan Aşyqbaev būl aqparatty joqqa şyǧardy. Onyŋ aituynşa, Qazaqstan Resei azamattaryn jappai elden şyǧaru turaly eşqandai şeşım qabyldamaǧan.
«Jalpy Qazaqstanda baspana ızdep kelgen şetel azamattaryna qatysty bız halyqaralyq mındettemelerımızge säikes äreket etemız. Resei azamattaryn elıne qaitaru mäselesı de tiıstı qūqyqtyq räsımder saqtalǧan jaǧdaida ǧana qaralady. Aldymen olar baspana ızdeuşı tūlǧa märtebesın alady. Odan keiın uäkılettı memlekettık organ şeşım qabyldaidy. Eger azamattar būl şeşımmen kelıspese, sotqa jügınu qūqyǧy bar. Tek osy prosesterden keiın ǧana olardyŋ şyqqan elıne qaitaryluy mäselesı qarastyryluy mümkın», – dedı Aşyqbaev.
Ol qazırgı uaqytta Reseidıŋ qanşa azamaty elden şyǧaryluy mümkın ekenı turaly naqty derek joq ekenın de aitty.
Al Qazaqstan Respublikasy Eŋbek jäne halyqty äleumettık qorǧau ministrlıgı mälımetınşe, Reseide 2022 jyly mobilizasiia jariialanǧannan keiın Qazaqstanǧa şamamen 837 myŋ Resei azamaty kelgen. Keiın olardyŋ 780 myŋǧa juyǧy elden ketken.
Qazır Qazaqstanda şamamen 298 myŋ Resei azamaty tūryp jatyr. Olardyŋ şamamen 30 myŋy resmi türde jūmys ısteidı, al 20 myŋǧa juyǧy qazaqstandyq joǧary oqu oryndarynda bılım alyp jür.
