Ūlan-Batyr qalasynda Qazaqstan men Moŋǧoliia Ūlttyq Olimpiadalyq komitetterı (ŪOK) basşylarynyŋ resmi jūmys kezdesuı öttı. Ekı el arasyndaǧy sporttyq yntymaqtastyqty nyǧaitudy közdegen būl jiynda älemge tanymal boksşy, Qazaqstan ŪOK prezidentı Gennadii Golovkin erekşe qūrmetke ie boldy, dep habarlaidy “Adyrna”.
Qazaqstan delegasiiasyn ŪOK prezidentı Gennadii Golovkin men ūiymnyŋ bas hatşysy Älımjan Aqaev bastap bardy. Moŋǧoliia tarapynan kezdesuge ŪOK bırınşı vise-prezidentı Choijgavaagiin Naranbaatar jäne bas hatşy Badar-Uugan Enhbat qatysty.
Kelıssözder barysynda taraptar tömendegıdei mäselelerdı talqylady:
- Ekı eldıŋ sport ūiymdary arasyndaǧy serıktestıktı keŋeitu;
- Yntymaqtastyq turaly arnaiy memorandum äzırlep, qol qoiu;
- Sport salasyndaǧy bırlesken bastamalar men täjıribe almasu baǧdarlamalaryn jüzege asyru.
«Bız ärdaiym özara cerıktestıkke aşyqpyz. Körşıles elder arasyndaǧy jaqsy qarym-qatynasty joǧary baǧalaimyz. Yntymaqtastyqtyŋ jüielı damuy olimpiadalyq qozǧalysqa tyŋ serpın beredı dep senemın», – dep atap öttı Gennadii Golovkin.
Sportty damytuǧa jäne halyqaralyq bailanysty nyǧaituǧa qosqan zor ülesı üşın moŋǧol tarapy Gennadii Golovkinge Moŋǧoliia ŪOK-nıŋ joǧary nagradasy «Altan Ochir» (Altyn gauhar) ordenın tabystady.
Sondai-aq Qazaqstan ŪOK bas hatşysy Älımjan Aqaev ūiymnyŋ 70 jyldyǧyna orai belgılengen mereitoilyq medalmen marapattaldy.
