Foto: äleumettık jelıden
Qazaqstannyŋ Eŋbek Erı, halyq jazuşysy, aqyn ärı qoǧam qairatkerı Mūhtar Şahanovpen qoştasu jäne jerleu räsımderınıŋ uaqyty men orny belgılı boldy.
Marqūmmen qoştasu räsımı 21 säuır künı saǧat 09:00-de Almaty qalasyndaǧy Abai atyndaǧy Qazaq ūlttyq opera jäne balet teatrynda ötedı. Al jerleu räsımı sol künı saǧat 11:30-da Almatydaǧy «Keŋsai-2» ziratynda ūiymdastyrylady.
Aita ketsek, būǧan deiın marqūmnyŋ jary Hanşaiym Şahanova Qazaqstan Prezidentı Qasym-Jomart Toqaevtyŋ atyna resmi ötınış joldaǧany habarlanǧan. Ötınış hatta Mūhtar Şahanovtyŋ soŋǧy amanaty körsetılgen - ony Türkıstan öŋırındegı Otyrar jerınde ornalasqan qasiettı Arystanbab kesenesı maŋyna jerleu.
Hatta aqynnyŋ qazaq qoǧamyndaǧy orny erekşe ekenı aitylyp, onyŋ Jeltoqsan oqiǧasynyŋ aqiqatyn aşudaǧy eŋbegı, ūlttyq ruhty köterudegı qyzmetı jäne el täuelsızdıgı, tıl men ruhaniiat jolyndaǧy küresı erekşe atalyp ötken.
Sondai-aq ötınışte memleket basşysynan aqynnyŋ soŋǧy amanatyn oryndauǧa rūqsat beru jäne jerleu räsımın Arystanbab kesenesı aumaǧynda zaŋ talaptaryna sai ūiymdastyruǧa qoldau körsetu sūralǧan edı.
