Türkiia İzrail prezidentı İshak Gersog mıngen ūşaqqa öz äue keŋıstıgı arqyly ūşuǧa rūqsat bermegenı aityldy, dep habarlaidy "Adyrna" ūlttyq portaly şeteldık BAQ-qa sıltep.
Mälımetke säikes, RİA Novosti agenttıgı Ankaradaǧy diplomatiialyq derekközdıŋ aqparatyn jariialaǧan. Onda Türkiia äue keŋıstıgı İzraildıŋ resmi delegasiialary men qaru-jaraq tasymaldaityn äue kemelerı üşın jabyq ekenı aitylǧan.
Sonymen qatar, üşınşı elderdıŋ tūraqty azamattyq reisterı üşın äue keŋıstıgı aşyq küiınde qalyp otyr. İzraildık äue kompaniialary da ony tranzittık maqsatta paidalana alady.
Türkiianyŋ rūqsat bermeuıne bailanysty ūşaq baǧytyn özgertıp, Europa men Resei aumaǧy arqyly ūşuǧa mäjbür bolǧan. Qalypty jaǧdaida reis Türkiia, Armeniia jäne Äzerbaijan arqyly ötetın edı.
Marşruttyŋ özgeruı saldarynan Tel-Aviv pen Astana arasyndaǧy ūşu uaqyty şamamen segız saǧatqa sozylǧan.
Aita keteiık, Türkiia Gaza sektory aumaǧyndaǧy äskeri operasiia bastalǧannan keiın İzrailmen diplomatiialyq qatynastaryn üzgen. Qazırgı taŋda ekı el arasyndaǧy bailanys tek arnaiy qyzmetter arqyly jüzege asyrylyp otyr.
