OPEK+ qūramyna kıretın jetı el mūnai öndıru kölemıne qatysty jaŋa şeşım qabyldady. Būl turaly alianstyŋ resmi mälımdemesınde jariialandy, dep habarlaidy “Adyrna”.
3 mamyr künı OPEK+ aiasynda Saud Arabiiasy, Resei, İrak, Kuveit, Qazaqstan, Aljir jäne Oman ökılderı virtualdy formatta kezdesu ötkızdı. Jiynda älemdık mūnai naryǧynyŋ qazırgı ahualy men aldaǧy damu ürdısterı talqylandy.
Kezdesu qorytyndysy boiynşa atalǧan elder naryq tūraqtylyǧyn saqtau maqsatynda mūnai öndıru kölemın täulıgıne şamamen 188 myŋ barrelge arttyruǧa kelıstı. Būl özgerıs 2026 jyldyŋ mausym aiynan bastap küşıne enedı.
Sonymen qatar qatysuşy memleketter naryqtaǧy jaǧdaidy tūraqty türde baqylap, qajet bolǧan jaǧdaida qabyldanǧan şeşımderdı qaita qarauǧa daiyn ekenın jetkızdı. Iаǧni, olar öndırıstı ūlǧaitu nemese şekteu şaralaryn jedel özgertıp, tıptı tolyqtai kerı qaitaru mümkındıgın de saqtap otyr.
Elder sondai-aq būryn qabyldanǧan mındettemelerge adal ekenın rastady. Onyŋ ışınde öndırıs kölemın retteu, artyq öndırılgen mūnaidy öteu jäne Bırlesken ministrlık monitoring komitetı baqylauyndaǧy kelısımderdı saqtau mäselelerı bar.
Aldaǧy uaqytta būl jetı memleket ai saiyn kezdesıp, naryqtaǧy özgerısterdı jäne öz mındettemelerınıŋ oryndaluyn talqylap otyrmaq. Kelesı kezdesu 2026 jylǧy 7 mausymǧa josparlanǧan.
Aita keteiık, būǧan deiın Bırıkken Arab Ämırlıkterı 2026 jyldyŋ 1 mamyrynan bastap OPEK pen OPEK+ qūramynan şyǧatynyn mälımdegen bolatyn.
