Jetısu oblysynda respublikalyq «Taza Qazaqstan» ekologiialyq baǧdarlamasy aiasynda mektep tülekterınıŋ qatysuymen auqymdy aǧaş jäne gül köşetterın otyrǧyzu aksiiasy öttı.
Ekologiialyq bastama jastardyŋ tuǧan jerge degen süiıspenşılıgın arttyryp, tabiǧatty aialau mädenietın qalyptastyruǧa baǧyttaldy.
İgı şaraǧa oblys boiynşa jalpy sany 32 023 tülek qatysty. Mektep bıtıruşı jastar tuǧan ölkesınıŋ körkeiuıne öz ülesterın qosyp, bolaşaqqa degen ızgı nietterın jasyl jelek otyrǧyzu arqyly jetkızdı.
Aksiia nätijesınde öŋır aumaǧynda 1 352 aǧaş jäne 2 389 gül köşetı otyrǧyzyldy. Söitıp mektep bıtıruşılerdıŋ öz qoldarymen ekken köşetterı olardyŋ tuǧan mektepterımen, balalyq şaǧymen jäne tuǧan ölkesımen bailanysynyŋ simvolyna ainaldy.
Is-şaraǧa arnaiy barǧan Jetısu oblysy äkımınıŋ orynbasary Marlen Kölbaev Taldyqorǧandaǧy N. Ostrovskii atyndaǧy №8 orta mektep pen B. Jolbarysūly atyndaǧy №18 orta mektep tülekterımen bırge köşet otyrǧyzu räsımıne qatysty.
Kezdesu barysynda oblys äkımınıŋ orynbasary jastardyŋ ekologiialyq bastamasyna joǧary baǧa berıp, olardyŋ tuǧan jerdıŋ damuyna qosyp jatqan ülesı maŋyzdy ekenın atap öttı. Sondai-aq jas ūrpaqty tabiǧatty qorǧauǧa, qorşaǧan ortaǧa janaşyrlyqpen qarauǧa şaqyrdy.
Sonymen qatar «Ädep-qūqyq jūmys jönındegı mentor» jobasy aiasynda mektep oquşylaryna arnalǧan arnaiy därıs saǧattary ūiymdastyrylyp, qūqyqtyq mädeniet, jauapkerşılık jäne qoǧamdyq tärtıp taqyryptary keŋınen tüsındırıldı.
–Bügın otyrǧyzǧan köşetımız – bızdıŋ mekteppen qoştasqan sätımızdıŋ estelıgı ǧana emes, tuǧan jerımızge degen qūrmetımızdıŋ belgısı. Jyldar öte būl aǧaştar ösıp, güldengen kezde bız de ömırde öz ornymyzdy tabamyz dep senemın, – dedı Nūrqasym Mubina.
Ekologiialyq aksiia aiasyndaǧy ıs-şaralar mūnymen şektelmei, Taldyqorǧan qalasynda käsıptık-tehnikalyq bılım beru ūiymdarynyŋ studentterı arasynda «Student CUP» şaǧyn futbol turnirı ūiymdastyryldy. Turnirdıŋ maqsaty – jastar arasynda salauatty ömır saltyn nasihattap, sport pen ekologiialyq mädeniettı ūştastyru boldy.
Jarysqa 14-35 jas aralyǧyndaǧy joǧary synyp oquşylary, kolledj jäne joǧary oqu orny studentterınen qūralǧan 8 komanda qatysyp, tartysty oiyn örnegın körsettı. Qorytyndysynda üzdık komandalar diplomdarmen, alǧys hattarmen jäne estelık syilyqtarmen marapattaldy.
Ūiymdastyruşylardyŋ aituynşa, mūndai igı bastamalar jastardyŋ tabiǧatqa degen janaşyrlyǧyn arttyryp qana qoimai, jauapkerşılık, ūiymşyldyq jäne belsendı azamattyq ūstanym qalyptastyruǧa yqpal etedı.
«Taza Qazaqstan» baǧdarlamasy aiasynda ötken būl aksiia ekologiialyq mädeniettı därıptegen, jastardy ortaq ıske jūmyldyrǧan jäne Jetısudyŋ jasyl kelbetın qalyptastyruǧa baǧyttalǧan taǧylymdy bastamalardyŋ bırı boldy.
