Kökşetau qalasynyŋ ortalyq alaŋynda, Abylai han eskertkışı maŋynda bolǧan oqiǧaǧa bailanysty qylmystyq ıs qozǧalyp, tergeu bastaldy, dep habarlaidy "Adyrna" ūlttyq portaly.
Aqmola oblysy polisiia departamentınıŋ mälımetınşe, 12 mausymǧa qaraǧan tünı saǧat 01:05 şamasynda mas küide bolǧan şetel azamaty qoǧamdyq tärtıptı būzyp, ainalasyndaǧylarǧa qauıp töndıretın äreketter jasaǧan. Aldyn ala mälımet boiynşa, ol Ortalyq mädeniet jäne demalys saiabaǧyndaǧy mülıktı örtemek bolǧan.
Alaida äreket barysynda er adam abaisyzda özı otqa oranyp, denesınıŋ şamamen 80 paiyzy küiıp qalǧan. Ol auyr halde medisinalyq mekemege jetkızılgen.
Polisiianyŋ habarlauynşa, atalǧan azamat oqiǧaǧa deiın bır kün būryn, 11 mausymda qoǧamdyq orynda mas küide jürgenı üşın äkımşılık jauapkerşılıkke tartylǧan. Sondai-aq onyŋ būǧan deiın de qoǧamdyq tärtıptı būzǧany üşın qūqyq qorǧau organdarynyŋ nazaryna bırneşe ret ılıkkenı aityldy.
Tergeu aiasynda oqiǧanyŋ türlı nūsqalary qarastyrylyp jatyr. Sonyŋ bırı boiynşa, şetel azamaty būryn polisiia bölımşesıne bırneşe ret jetkızılgenı üşın kek alu maqsatynda saiabaq mülkın örtemek bolǧan boluy mümkın. Alaida būl nūsqa äzırge resmi türde rastalǧan joq.
