Jetısu oblysynda Balqaş kölınıŋ jaǧalauyndaǧy infraqūrylymdy damytu jūmystary jalǧasuda. Jaǧalauda üş kommunaldyq qoǧamdyq jaǧajai salynady, onyŋ ekeuın osy jazda paidalanuǧa beru josparlanǧan. Bır mezette şamamen üş myŋ adam demala alatyn alǧaşqy jaǧajai şılde aiynda paidalanuǧa berıluı tiıs. Ondaǧy qūrylys jūmystarynyŋ barysymen Jetısu oblysynyŋ äkımı Beibıt İsabaev Sarqan audanyna jasaǧan jūmys saparynda tanysty, - dep habarlaidy Jetısu oblysy äkımınıŋ baspasöz qyzmetı.
Kommunaldyq jaǧajailardyŋ qūrylysyn jürgızıp jatqan merdıger ūiym ökılderımen qūrylys barysyn talqylaǧan öŋır basşysy būl jobanyŋ jüzege asyryluy köl jaǧalauyndaǧy turizmdı damytuǧa baǧyttalǧan jüielı jūmystyŋ maŋyzdy kezeŋı ekenın atap öttı.
– Memleket basşysynyŋ tapsyrmasyn ıske asyru maqsatynda Balqaş kölınıŋ jaǧalauyndaǧy turizmdı damytu baǧytynda bırqatar şaralar qabyldadyq. Aldymen bas jospar men egjei-tegjeilı josparlau jobasy bekıtıldı. Odan keiın kölge kölıkpen jetuge jaǧdai jasau men jaǧalau infraqūrylymyn damytuǧa qatysty bırqatar mäseleler şeşıldı. Mūnan soŋ kommunaldyq qoǧamdyq jaǧajailardyŋ qūrylysy qolǧa alyndy. Būl jobada suǧa tüsuge qolaily jaǧdai jasalǧan jäne demaluǧa arnalǧan arnaiy aimaqtarmen jabdyqtalǧan, abattandyrylǧan jaǧalau jelısın qalyptastyru qarastyrylǧan. Qazırgı kezde osyndai üş jaǧajai salu josparlanyp otyr. Onyŋ bırınşısı şılde aiynyŋ alǧaşqy onkündıgınde paidalanuǧa berıledı, ekınşısı – tamyz aiynda. Üşınşı jaǧajaidyŋ qūrylysy biyl bastalyp, kelesı jyldyŋ şomylu mausymy bastalǧanǧa deiın aiaqtalady dep josparlanyp otyr. Būl kommunaldyq jaǧajailar halyq üşın qoljetımdı, jaily ärı qauıpsız demalysty ūiymdastyru maqsatynda salynyp jatyr, – dep atap öttı B. İsabaev.
Eske salsaq, atalǧan jobany tabysty jüzege asyru üşın kölge deiıngı 137 şaqyrym jol qaita jaŋǧyrtylyp, paidalanuǧa berıldı. Qazırgı uaqytta jol boiyndaǧy infraqūrylymdy damytu jūmystary jalǧasuda. Atap aitqanda, sanitarlyq toraptar ornatylyp, demalys oryndary men qoqys konteinerlerı ornalastyryluda. Sondai-aq kondisionerlermen jäne sumen jabdyqtau jüiesımen jabdyqtalǧan bırneşe jyly sanitarlyq torap salu josparlanǧan. Sonymen qatar Lepsı auylyna kıreberıste 10-nan astam kölıkke arnalǧan tūraq alaŋy ūiymdastyrylǧan. Mūnda şaǧyn fud-aimaq ornalastyru közdelgen. Qazırgı kezde ana men bala bölmesı jäne basqa da qajettı qyzmettık bölmelerı bar jyly därethananyŋ qūrylysy jürgızılude. Būl şaralardyŋ barlyǧy turister üşın qolaily jaǧdai jasap, Balqaş jaǧalauyna keluşılerdıŋ jaily demaluyna mümkındık beruge baǧyttalǧan.
Sonymen qatar ūzyndyǧy 9,3 şaqyrym bolatyn jaǧalau boiyndaǧy avtojoldyŋ qūrylysy da aiaqtaluǧa jaqyn. Lepsı auylynan köl jaǧalauyna deiın elektrmen jäne sumen jabdyqtau jelılerı tartyldy. Jaǧalauda 32 şaqyrym su qūbyry, 49 şaqyrym elektrmen jabdyqtau jelılerı jäne 16 şaqyrym kärız jüiesı salyndy. Būdan bölek, kärız-tazartu qūrylysy salynuda. Jaǧalaudyŋ sanitarlyq jaǧdaiyn jaqsartu üşın «Balqaş Tazalyq» kommunaldyq käsıporny qūryldy. Osylaişa, Balqaş kölınıŋ jaǧalauyndaǧy turistık infraqūrylymdy damytu baǧytynda qysqa merzım ışınde auqymdy jūmystar atqaryldy.
– Üş kommunaldyq jaǧajai – būl ülken bastamanyŋ alǧaşqy qadamy. Eger qajettılık tuyndap, turister legı köbeise, qoǧamdyq jaǧajailardyŋ sanyn kezeŋ-kezeŋımen arttyra beremız. Sonymen qatar jeke investorlar men käsıpkerler zamanaui demalys bazalaryn, demalys aimaqtaryn, fud-korttar jäne basqa da turistık nysandar saluǧa tartyluda. Jalpy alǧanda, aldaǧy 3–5 jyl ışınde Balqaş kölınıŋ jaǧalauynda Alakölden kem tüspeitın, tıptı odan da qolaily demalys jaǧdailary jasalady. Öitkenı köl jaǧalauynda retsız qūrylysqa jol berılmeidı, – dedı oblys äkımı.
Sonymen qatar jalpy aumaǧy şamamen 7 gektardy qūraityn alǧaşqy qoǧamdyq jaǧajaida 500 avtokölıkke arnalǧan ülken avtotūraq, futbol jäne voleibol alaŋdary, vorkaut alaŋy, balalar oiyn alaŋy, besedkalar, oryndyqtar, sanitarlyq toraptar, qoqys jäşıkterı, duş kabinalary, kiım auystyratyn oryndar, auyzsu subūrqaqtary, künqaǧarlar men şezlongtar, qūtqaru mūnarasy jäne türlı şaǧyn säulettık nysandar ornalastyrylady. Sondai-aq arnaiy fud-aimaq qarastyrylǧan. Būdan bölek, äkımşılık ǧimarat salynyp, onda polisiia men tötenşe jaǧdailar qyzmetınıŋ beketterı, medisinalyq punkt, sondai-aq ana men bala bölmesı jūmys ısteitın bolady.
Balqaş jaǧalauyndaǧy igı bastamalarǧa qatysty demaluşylar da pıkır bıldırdı. Solardyŋ bırı – taldyqorǧandyq Abylai Mahmet:
– Qazır Balqaş kölıne jetu öte yŋǧaily boldy. Bız mūnda nebärı bır jarym saǧatta jettık. Joldyŋ sapasy öte jaqsy. Jalpy, men üşın öz öŋırımızde demalǧan qyzyq. Jetısudyŋ tabiǧaty öte körkem ärı aluan türlı. Ärine, infraqūrylymnyŋ damyp, demaluşylar üşın qolaily jaǧdailar jasalyp jatqanyna quanamyz. Balqaş jaǧalauynyŋ da abattandyrylyp, jaŋa, ädemı ärı zamanaui kelbetke ie bolatyny turaly jaŋalyqty estıp bıldık. Mūnyŋ bärı halyq üşın jasalyp jatyr, būl öte quanyşty jaǧdai, – dedı ol.
Sarqan audany äkımdıgınıŋ mälımetınşe, Balqaş jaǧalauyndaǧy infraqūrylymdy damytu jūmystary qazırdıŋ özınde multiplikativtık äser berude. Jaŋa jūmys oryndary aşylyp, audan ekonomikasyna investisiia tartyluda. Mysaly, qyzyqty derekterdıŋ bırı – Lepsı auylynda jeke investordyŋ qarjysy esebınen auyldaǧy alǧaşqy qonaqüi salynyp jatyr.
Jalpy alǧanda, öŋırde qabyldanyp jatqan şaralardyŋ nätijesınde aldaǧy jyldary Balqaş kölı turisterdı tartatyn negızgı ortalyqtardyŋ bırıne ainalady dep kütılude. Qazırgı taŋda mausym kezınde köl jaǧalauynda 50 myŋnan astam adam demalady. Alaida josparlanǧan infraqūrylymdyq jobalar tolyq jüzege asqannan keiın mūnda jyl saiyn 450 myŋnan astam adamnyŋ demaluyna mümkındık tuady.
