Bügın, 1 şıldede Tötenşe jaǧdailar ministrlıgı qatty jauyn-şaşynǧa bailanysty Almaty taularyndaǧy Kışı Almaty özenı alabynda sel jüru qaupı bar ekenın eskerttı, dep habarlaidy «Adyrna» tılşısı.
Mamandar qala tūrǧyndary men qonaqtaryna aua raiy tūraqtalǧanǧa deiın Ile Alatauyna barudan uaqytşa bas tartudy sūrady.
«Sel qaupı bar aimaqta kelesı qauıpsızdık erejelerın saqtaŋyz:
• taudaǧy jaǧdai turaly resmi aqparattardy ünemı baqylaŋyz;
• sel qaupı töngen nemese sel bastalǧan jaǧdaida dereu biık jerge köterılıŋız;
• özen arnalarynyŋ, sel jüruı mümkın sailardyŋ, köl bögetterınıŋ üstınde jäne tömengı jaǧynda şatyr tıgıp demalmaŋyz;
• taudyŋ joǧarǧy bölıgınde nöser jauyn jauyp jatsa, özen arnasynan jäne qauıptı aimaqtan dereu ketıŋız. Özıŋızdı jäne jaqyndaryŋyzdy qorǧaŋyz!»– delıngen habarlamada.
TJM, «Qazseldenqorǧau» jäne Almaty qalasy Tötenşe jaǧdailar departamentınıŋ azamattyq qorǧau qyzmetterı küşeitılgen rejimde jūmys ıstep jatqany aityldy. Ministrlık mälımetınşe, jaǧdai tūraqty baqylauda, sel qaupı bar uchaskelerge monitoring jürgızılude, qūtqaru bölımşelerı jedel äreket etuge daiyn.
Sondai-aq halyqty jedel habardar etu maqsatynda Nauryzbai audanynda jergılıktı qūlaqtandyru jüiesı ıske qosylǧan.
«Būl - tūrǧyndarǧa aqparatty uaqtyly jetkızuge baǧyttalǧan aldyn alu şarasy. Sabyr saqtap, tek resmi aqparat közderıne ǧana senulerıŋızdı sūraimyz»,— dep tüsındırdı TJM.
