Bügın Ortalyq sailau komissiiasynyŋ otyrysynda 2026 jylǧy 23 tamyzǧa taǧaiyndalǧan Qazaqstan Respublikasy Qūryltaiynyŋ deputattaryn sailauǧa «Qazaqstan Halyq partiiasy» qoǧamdyq bırlestıgınıŋ partiialyq tızımın tırkeu mäselesı qaraldy.
Aǧymdaǧy jylǧy 9 şıldede Ortalyq sailau komissiiasyna «Qazaqstan Halyq partiiasy» qoǧamdyq bırlestıgı partiialyq tızımın ūsynuǧa qatysty qūjattaryn tapsyrǧan bolatyn. Ortalyq sailau komissiiasy sailau zaŋnamasyna säikes kandidattardyŋ Qazaqstan Respublikasy Konstitusiiasy men «Qazaqstan Respublikasyndaǧy sailau turaly» Konstitusiialyq zaŋda belgılengen talaptarǧa säikestıgın anyqtau räsımderın jürgızdı.
Kün tärtıbındegı mäsele boiynşa baiandama jasaǧan OSK müşesı Äsel Janäbılova kandidattarǧa zaŋnamada qoiylatyn talaptar turaly aitty. Atap aitqanda, kandidat Qazaqstan Respublikasynyŋ azamaty boluy, soŋǧy 10 jyl boiy Qazaqstan Respublikasynyŋ aumaǧynda tūraqty tūruy jäne jasy 25-ten kem bolmauy tiıs.
«Qazaqstan Halyq partiiasy» 72 adamnan tūratyn partiialyq tızımdı ūsyndy. Onyŋ ışınde 30 kandidat - äielder, jastar jäne mügedektıgı bar adamdar. Būl jalpy tızımnıŋ 41,7%-yn qūraidy. Zaŋda belgılengen kvota saqtalǧan. Ortalyq sailau komissiiasynyŋ uäkılettı memlekettık organdarǧa joldaǧan sūraularyna säikes partiialyq tızımge engızılgen tūlǧalardyŋ Qazaqstan Respublikasy Konstitusiiasy men «Qazaqstan Respublikasyndaǧy sailau turaly» Konstitusiialyq zaŋ talaptaryna säikestıgı tekserıldı. Partiialyq tızımge engızılgen barlyq tūlǧalar zaŋnamada belgılengen talaptarǧa säikes keledı», - dep tüiındedı Ortsailaukom müşesı.
Äsel Janäbılova sondai-aq «Qazaqstan Halyq partiiasy» 2023 jylǧy 19 nauryzda ötken Qazaqstan Respublikasy Parlamentı Mäjılısı deputattarynyŋ sailauynda sailauşylardyŋ 5 paiyzdan astamynyŋ dauysyn alǧanyn eske saldy. Osyǧan bailanysty zaŋǧa säikes partiia sailau jarnasyn töleuden bosatylady.
OSK müşelerı tiıstı hattamalarǧa qol qoiǧannan keiın 2026 jylǧy 23 tamyzǧa taǧaiyndalǧan Qazaqstan Respublikasy Qūryltaiynyŋ deputattaryn sailauǧa «Qazaqstan Halyq partiiasy» partiialyq tızımın tırkeu turaly qauly qabyldandy. Tırkelgen kandidattarǧa tiıstı kuälıkter tabystaldy.
Otyrys qorytyndysy boiynşa partiia basşylyǧy dästürlı brifing barysynda būqaralyq aqparat qūraldary ökılderınıŋ sūraqtaryna jauap berdı.
