Qazaqstanda törtınşı mūnai öŋdeu zauytyn salu jobasy praktikalyq kezeŋge öttı. Qazır bolaşaq käsıporynǧa arnalǧan tehnikalyq-ekonomikalyq negızdeme äzırlenıp jatyr. Qūjat qūrylys jürgızuge eŋ tiımdı oryndy jäne şikızat jetkızu tızbegın aiqyndauy tiıs. Būl turaly Energetika ministrı Erlan Aqkenjenov aitty, dep habarlaidy «Adyrna» tılşısı Exclusive.kz-ke sılteme jasap.
Ministrdıŋ sözınşe, jaŋa mūnai öŋdeu keşenı jylyna 10 million tonnaǧa deiın mūnai öŋdeuge qauqarly bolady.
«Sarapşylarǧa Qaşaǧan men Teŋız ken oryndarynan şikızat jetkızu logistikasynan bastap, qūrylysqa eŋ qolaily oryndy anyqtauǧa deiıngı barlyq nūsqany jan-jaqty esepteu tapsyryldy. Zauyttyŋ qai jerde ornalasatyny jönındegı şeşım tek ekonomikalyq tiımdılık, logistika jäne tehnologiialyq esepteuler negızınde qabyldanady», – dedı ministr.
Aqkenjenovtıŋ aituynşa, jaŋa käsıporynnyŋ qūrylysy ışkı mūnai önımderı naryǧynyŋ ūzaq merzımdı tūraqtylyǧyn qamtamasyz etuge mümkındık beredı. Bolaşaqta būl mūnai öŋdeu zauyty mūnai-gaz himiiasy salasyn damytatyn maŋyzdy ortalyqtardyŋ bırıne ainalmaq.
Ministr Qazaqstannyŋ gaz salasyndaǧy ırı jobalardy da jalǧastyryp jatqanyn atap öttı. Qazırgı taŋda elımızde 13 millionnan astam adam, iaǧni halyqtyŋ 64 paiyzdan astamy tabiǧi gazben qamtylǧan. 2035 jylǧa qarai gazdandyru deŋgeiın 80 paiyzǧa jetkızu josparlanyp otyr. Negızgı jobalardyŋ bırı – elımızdıŋ soltüstık öŋırlerın senımdı gazben qamtamasyz etuge arnalǧan Esıl – Astana magistraldyq gaz qūbyrynyŋ qūrylysy.
Sonymen qatar 2027 jyly Qaşaǧan ken ornynda jylyna 1 milliard tekşe metr gaz öŋdeitın gaz öŋdeu zauytyn ıske qosu josparlanǧan. Taǧy bır gaz öŋdeu zauyty Jaŋaözende salynyp jatyr. 2030 jylǧa qarai Qaşaǧan men Qaraşyǧanaqtaǧy jalpy quaty 7,5 milliard tekşe metr bolatyn jaŋa keşenderdı paidalanuǧa beru közdelude. Būl 2032 jylǧa qarai Qazaqstandaǧy tauarlyq gaz öndırısın qazırgı 27 milliard tekşe metrden 35 milliard tekşe metrge deiın arttyruǧa mümkındık beredı.
