Aizere Jeŋıshanova respublikalyq jäne halyqaralyq bılım dodalarynda bırneşe ret jüldege ie bolyp, biyl Taşkentte ötken Halyqaralyq himiia olimpiadasynyŋ (IChO) altyn medal iegerı atandy. 24 tamyzda memleket basşysy Qasym-Jomart Toqaevpen kezdesken jas olimpiadaşy «Adyrna» tılşısıne Aqordadaǧy erekşe sätı men jetıstıkke jetu joly turaly aityp berdı.
Qazaqstandyq oquşylar halyqaralyq olimpiadalarda joǧary nätije körsetıp, el namysyn abyroimen qorǧap jür. Solardyŋ qatarynda Şyǧys Qazaqstan oblysyndaǧy himiia-biologiia baǧytyndaǧy Nazarbaev Ziiatkerlık mektebınıŋ 12-synyp oquşysy Aizere Jeŋıshanova da bar.
Jas daryn Aqordadaǧy jüzdeau ömırındegı eŋ erekşe oqiǧalardyŋ bırıne ainalǧanyn jetkızdı.
«Şynymdy aitsam, bastapqyda Aqordaǧa baryp, prezidentpen kezdesemın dep oilaǧan joqpyn. Menıŋ basty maqsatym – olimpiadada jaqsy nätije körsetu bolatyn. Al Aqordaǧa şaqyru alyp, söz söileitınımdı bılgenımde qatty quandym ärı azdap qobaljydym. Prezident rezidensiiasyn ışınen körgende qatty taŋǧaldym. Osyndai baqyttyŋ maǧan būiyrǧanyna quanyştymyn», - deidı ol.
Aizerenıŋ ǧylym jolyndaǧy jetıstıkterı erte jastan bastalǧan. Ol 8 synyptan bastap himiia pänıne erekşe qyzyǧuşylyq tanytqan. 2023 jyly respublikalyq iuniorlar olimpiadasynda kümıs jüldeger atanǧan. Keiıngı jyldary respublikalyq olimpiadalardyŋ bırneşe dürkın altyn jüldegerı bolǧan. Sondai-aq Rumyniiada ötken IJSO olimpiadasynyŋ kümıs jüldesın, Braziliiada bolǧan halyqaralyq Mendeleev olimpiadasynyŋ qola medalın, al 2026 jyly Mäskeude ötken Mendeleev olimpiadasynyŋ kümıs medalın jäne Taşkenttegı Halyqaralyq himiia olimpiadasynyŋ altyn medalın ielengen.
Jas himik özınıŋ ärbır jetıstıgınıŋ artynda ata-anasy men ūstazdarynyŋ eŋbegı tūrǧanyn erekşe atap öttı.
«Ata-anam maǧan ärqaşan senım artty. Jeŋılıs bolǧan sätterde de qoldau körsetıp, jıgerlendırıp otyrdy. Al ūstazdarym pänge degen qyzyǧuşylyǧymdy arttyryp, olimpiadalyq esepterdı taldauǧa köp küş saldy. Menıŋ jeŋısımnıŋ artynda ūstazdarymnyŋ eŋbegı men ata-anamnyŋ senımı bar», -deidı Aizere.
Aituynşa, halyqaralyq olimpiadaǧa deiıngı jol bırneşe jylǧa sozylatyn kürdelı daiyndyq kezeŋınen tūrady.
«Halyqaralyq olimpiadaǧa ötu jäne oǧan daiyndalu – bırneşe qadamnan tūratyn jüie. Onyŋ bärı şamamen 7–8-synyptardan bastalady. Menıŋ oiymşa, teoriialyq aqparatty meŋgeru praktikalyq bölımnen äldeqaida qiynyraq boldy. Sondyqtan olimpiadaǧa daiyndyq barysynda bas nazarymdy teoriiaǧa qoiamyn. Qazaqstanda olimpiadalyq qozǧalystaǧy bäsekelestık öte joǧary. Jarys kezınde qobaljudy jeŋuge komanda ışındegı timbilding şaralary men tälımgerlerdıŋ qoldauy köp kömektesedı»,- deidı ol.
Aizerenıŋ pıkırınşe, olimpiadalardaǧy eŋ ülken qiyndyq – tapsyrmalardy aldyn ala boljaudyŋ mümkın emestıgı.
«Olimpiadada qandai taqyryptar men esepterdıŋ keletının naqty bıle almaisyŋ. Sebebı format pen taqyryptar jyl saiyn özgerıp otyrady. Dästürlı türde Qytai, AQŞ jäne Resei qūramalary myqty bäsekelestık körsetedı. Soŋǧy jyldary Özbekstan qūramasy da joǧary nätije körsetıp keledı»,- deidı olimpiadaşy.
Jas daryn bolaşaǧyn ǧylymmen bailanystyryp otyr.
«Osy ǧylym salasymen ainalysqym keledı. Äsırese, bügıngı ekologiialyq mäselelerdı şeşuge öz ülesımdı qosamyn dep ümıttenemın. Bolaşaqta himiia salasy boiynşa oquymdy Gonkongta, AQŞ-ta nemese Qazaqstanda jalǧastyrmaq oiym bar», - deidı ol.
Aizere Jeŋıshanovanyŋ jetıstıkterı – tabandylyqtyŋ, jüielı daiyndyqtyŋ jäne bılımge degen qūştarlyqtyŋ nätijesı. Aqorda törınde söz söilegen jas daryn bügınde Qazaqstannyŋ ǧana emes, halyqaralyq ǧylymi olimpiadalardaǧy üzdık oquşylardyŋ qataryna qosylyp otyr.
Eske salaiyq, keşe prezident Qasym-Jomart Toqaev halyqaralyq pän olimpiadalarynda jeŋımpaz atanyp, jüldelı oryndarǧa ie bolǧan oquşylarmen jäne studenttermen kezdesken edı. Saltanatty ıs-şaraǧa 21 laureat, sondai-aq olardyŋ ūstazdary men tälımgerlerı qatysty.
Äŋgımelesken Diana Asan
