Densaulyq saqtau ministrlıgı balalarǧa baǧyttalǧan fastfud, tättı susyndar jäne qūramynda qant, tūz ben qanyqqan mailar mölşerı joǧary basqa da önımderdıŋ jarnamasyn şekteu boiynşa zaŋnamalyq ūsynystar äzırledı. Būl turaly bügın, 9 qyrküiekte ministrlıktıŋ baspasöz qyzmetı jazdy, dep habarlaidy «Adyrna» tılşısı.
Būǧan deiın memleket basşysy Qasym-Jomart Toqaev Ükımetke fastfudtyŋ agressivtı jarnamasy mäselesın qarastyrudy tapsyrǧan bolatyn. Ol mūndai jarnamanyŋ ziiandy ädetterdıŋ qalyptasuyna yqpal etetının, densaulyq saqtau jüiesıne tüsetın jüktemenı arttyratynyn jäne eldıŋ eŋbek äleuetıne kerı äser etetının atap ötken.
Ministrlık mälımetınşe, zaŋnamalyq bastamalardyŋ negızgı maqsaty – balalardyŋ taǧamdyq talǧamyna marketingtık yqpaldy azaitu jäne erte şaqtan bastap dūrys tamaqtanu ädetterın qalyptastyruǧa yqpal etu.
Azyq-tülık önımderınıŋ jarnamasy balalar men jasöspırımderge aitarlyqtai äser etedı. Olar jarqyn qaptamaǧa, äleumettık jelıler, blogerler arqyly jarnamalauǧa jäne basqa da marketingtık qūraldarǧa köbırek beiım keledı.
«Ministrlık qūramynda tūz, qant, qanyqqan jäne transmailar mölşerı joǧary tamaq önımderınıŋ jarnamasyn tele- jäne radioarnalarda, äleumettık jelılerde, syrtqy jarnama qūraldarynda şekteu boiynşa zaŋnamaǧa özgerıster engızu jönınde ūsynystar äzırledı. Atalǧan ūsynystardy ıske asyru maqsatynda osy şekteulerdıŋ retteuşılık äserın taldaudy äzırleu jūmystary bastaldy», – QR Densaulyq saqtau ministrlıgı Medisinalyq kömektı ūiymdastyru departamentınıŋ direktory Gülnar Särsembaeva apparattyq keŋeste söilegen sözınde.
Zertteu derekterıne säikes, 6–9 jas aralyǧyndaǧy balalardyŋ 23%-ynda artyq dene salmaǧy bar, al 6%-y semızdıkke şaldyqqan. Sonymen qatar jasöspırımderdıŋ 17,5%-y energetikalyq susyndardy apta saiyn tūtynady.
Zaŋnamaǧa özgerıster engızu jönındegı ūsynystar halyqaralyq täjıribe men Düniejüzılık densaulyq saqtau ūiymynyŋ ūsynymdaryn eskere otyryp äzırlengen.
Aita keteiık, bügınde Qazaqstanda dūrys tamaqtanu mädenietın qalyptastyruǧa baǧyttalǧan bırqatar şara qazırdıŋ özınde jüzege asyryluda. 21 jasqa tolmaǧan adamdarǧa energetikalyq susyndardy satuǧa tyiym salynǧan. 2025 jylǧy qyrküiekten bastap bılım beru ūiymdarynda jaŋa tamaqtanu standarty qoldanysqa engızıldı. Ol rasiondaǧy qant pen tūz mölşerın azaitudy, sondai-aq kökönıster, jemıster jäne süt önımderınıŋ ülesın arttyrudy közdeidı.
