Qūryltai deputaty Maksim Rojin Qazaqstan men Oŋtüstık Koreia arasyndaǧy yntymaqtastyqtyŋ jaŋa kezeŋıne qatysty pıkır bıldırdı, dep habarlaidy «Adyrna» tılşısı.
Onyŋ aituynşa, Seulde ötken alǧaşqy «Ortalyq Aziia – Koreia Respublikasy» sammitı Qazaqstannyŋ Koreiamen qarym-qatynasty dästürlı sauda-investisiialyq bailanystar deŋgeiınen tehnologiialyq jäne önerkäsıptık kooperasiianyŋ jaŋa satysyna köteruge ūmtylysyn körsetken.
«Qūryltaidaǧy Halyqaralyq ıster, qorǧanys jäne qauıpsızdık komitetınde jūmys ısteitın deputat retınde elımızdıŋ halyqaralyq arenadaǧy ärbır maŋyzdy qadamyna erekşe nazar audaramyn. Būl menıŋ tıkelei jūmys baǧytym ǧana emes, elımızdıŋ syrtqy saiasatynyŋ qalai qalyptasyp, qandai basymdyqtarǧa bet alyp bara jatqanyn tüsınuge mümkındık beretın maŋyzdy körsetkış.
Äsırese Memleket basşysynyŋ halyqaralyq kezdesulerdegı sözderıne män beremın. Prezidenttıŋ ärbır mälımdemesınen Qazaqstannyŋ kımmen ärıptestık ornatuǧa müddelı ekenın ǧana emes, qandai ärıptestık bız üşın maŋyzdy ekenın aŋǧaruǧa bolady. Seulde ötken alǧaşqy «Ortalyq Aziia – Koreia Respublikasy» sammitınde osy tūrǧydan alǧanda maŋyzdy signaldar berıldı»,–dep jazdy ol.
Maksim Rojin öndırıs pen tehnologiia, asa maŋyzdy mineraldar, jasandy intellekt, kölık-logistika, energetika, su qauıpsızdıgı jäne adami kapital salalaryndaǧy ärıptestıktıŋ maŋyzyna toqtaldy. Onyŋ pıkırınşe, Qazaqstan tabiǧi resurstardy eksporttaumen şektelmei, tehnologiialyq kooperasiia men joǧary qosylǧan qūny bar önım öndıruge basymdyq beruı tiıs.
Sondai-aq deputat sirek jäne sirek kezdesetın metaldardy zertteu baǧytyndaǧy qazaq-korei jobalary, jasandy intellekt salasyndaǧy öŋırlık baǧdarlamalar jäne kölık-logistikalyq dälızderdı damytu bastamalarynyŋ strategiialyq maŋyzyn atap öttı.
«Halyqaralyq kelısımderdıŋ naqty qūndylyǧy olardyŋ mätınınde emes, azamattarǧa, ekonomikaǧa jäne memlekettıŋ tehnologiialyq äleuetıne beretın nätijesınde», – dedı Maksim Rojin.
Onyŋ aituynşa, aldaǧy kezeŋde Qazaqstan üşın tartylǧan investisiia kölemı, ıske qosylǧan öndırıster sany, lokalizasiialanǧan tehnologiialar, daiarlanǧan mamandar jäne el ışınde qalyp otyrǧan qosylǧan qūn negızgı körsetkışterge ainaluy tiıs.
Deputattyŋ pıkırınşe, alǧaşqy «Ortalyq Aziia – Koreia Respublikasy» sammitı saiasi dialogtyŋ jalǧasy ǧana emes, Qazaqstannyŋ resurstyq, geografiialyq jäne adami äleuetın Koreianyŋ tehnologiialyq mümkındıkterımen ūştastyruǧa baǧyttalǧan maŋyzdy qadam bolǧan.
Prezident Toqaev pen Si Szinpin Astanadaǧy kezdesu qorytyndysy boiynşa bırqatar qūjattarǧa qol qoidy
