«Ädılet» partiiasy fraksiiasynyŋ deputaty Meirambai Kemalov elımızde qala infraqūrylymynyŋ bülınuı men zaŋsyz graffiti salu faktılerın jedel anyqtau üşın «Vandalizm qaupı joǧary aimaqtar kartasyn» qūrudy ūsyndy. Būl turaly ol Premer-ministr Oljas Bektenovke joldaǧan deputattyq saualynda aitty, dep habarlaidy «Adyrna» tılşısı.
Onyŋ sözınşe, jauapkerşılıktıŋ küşeitılgenıne qaramastan, köşedegı vandalizm mäselesı özektı bolyp otyr. Meirambai Kemalov qosymşa şaralar qabyldau qajettıgın memleket basşysynyŋ zaŋsyz graffiti saluǧa qataŋ tosqauyl qoiu jäne mūndai äreketterdı vandalizm ärı būzaqylyq retınde qarastyru jönındegı tapsyrmasymen bailanystyrdy.
Deputat zaŋ būzuşylar jedel anyqtalmaitynyn atap öttı. Onyŋ sözınşe, ǧimarattardyŋ qasbetterıne, aialdamalarǧa, jerasty ötkelderıne jäne basqa da qoǧamdyq oryndarǧa graffiti men türlı beineler köbıne bırneşe minuttyŋ ışınde, negızınen tüngı uaqytta salynady.
Sondai-aq ol zaŋdy strit-art üşın arnaiy jabdyqtalǧan qalalyq alaŋdardyŋ jetkılıksızdıgın mälımdedı. Baqylaudy küşeitu maqsatynda Meirambai Kemalov Işkı ıster ministrlıgıne Bas prokuraturanyŋ Qūqyqtyq statistika jäne arnaiy esepke alu jönındegı komitetınıŋ «Qylmystyq qūqyq būzuşylyqtar kartasyna» ūqsas «Vandalizm qaupı joǧary aimaqtar kartasyn» qūrudy ūsyndy.
Deputattyŋ bastamasyna säikes, karta naqty uaqyt rejimınde geografiialyq koordinattar boiynşa problemaly aumaqtardy körsetuı tiıs. Būl sol aumaqtarda nysanaly profilaktikalyq şaralardy qabyldauǧa, patruldeu men beinebaqylaudy küşeituge, jaryqtandyru jäne abattandyru jūmystaryn jaqsartuǧa mümkındık beredı.
Sonymen qatar deputat qūqyq būzuşylyqtardyŋ aldyn alu üşın «Sergek» jüiesın qosa alǧanda, qoldanystaǧy sifrlyq jüielerge beineanalitika jäne bet-älpettı tanu algoritmderın integrasiialaudy ūsyndy.
Kemalov Ükımetke Bas prokuraturamen bırlesıp, ǧimarattardyŋ qasbetterı men basqa da ortaq paidalanylatyn nysandarǧa grafikalyq jäne özge de beinelerdı rūqsatsyz saluǧa tolyq tyiym salu mäselesın qarastyrudy ūsyndy.
