Tokionyŋ ortalyq bölıgınde 34 kün qatarynan jaŋbyr jaudy, dep habarlaidy "Adyrna" tılşısı.
Üzdıksız jauyn-şaşyn 29 qyrküiekke deiın jalǧasyp, būl körsetkış Japoniiada meteorologiialyq baqylau jürgızıle bastaǧan 1886 jyldan bergı eŋ ūzaq kezeŋ retınde tırkeldı.
Japoniia meteorologiialyq agenttıgınıŋ mälımetınşe, būǧan deiıngı rekord 2019 jyly tırkelgen. Sol kezde Tokionyŋ ortalyǧynda 27 mausym men 29 şılde aralyǧynda 33 kün qatarynan jaŋbyr jauǧan.
Biylǧy ūzaqqa sozylǧan jauyn-şaşynǧa Honsiu araly maŋynda ornalasqan tūraqty atmosferalyq front äser etken. Sondai-aq jyly ärı ylǧaldy auanyŋ bırneşe ret keluı jäne taifundardyŋ jaqyndauy jauyn-şaşyn mölşerınıŋ artuyna yqpal etken.
27 qyrküiektegı jaǧdai boiynşa Tokionyŋ ortalyǧynda qyrküiek aiynda 621,5 millimetr jauyn-şaşyn tüsken. Būl ailyq ortaşa körsetkışten şamamen üş ese köp. Qyrküiektegı eŋ joǧary körsetkış 1958 jyly tırkelıp, ol kezde 670,9 millimetr jauyn-şaşyn tüsken.
Sonymen qatar 1–27 qyrküiek aralyǧynda Tokionyŋ ortalyǧynda kün säulesı nebärı 45,8 saǧat boiy baiqalǧan. Būl — baqylau tarihyndaǧy eŋ tömen körsetkışterdıŋ bırı.
Meteorologtardyŋ mälımetınşe, 30 qyrküiekte Tokio ornalasqan Kanto aimaǧynda atmosferalyq fronttyŋ äserınen jaŋbyr qaita jauuy mümkın.
