Öskemen qalasynyŋ tūrǧyny özınıŋ fotosuretın äleumettık jelıde kelısımınsız jariialap, ar-namysyna tietın mälımetter taratqan azamattardy sotqa berdı. Būl turaly 30 qyrküiekte Joǧarǧy sot jazdy, dep habarlaidy «Adyrna» tılşısı.
Is materialdaryna säikes, Instagram jelısındegı ekı qoldanuşy äieldıŋ suretın ädepsız pıkırlermen bırge jariialap, onyŋ mınez-qūlqy turaly dälelsız aiyptaular aitqan. Jariialanym avtorlary mūny «jeke pıkır» dep tüsındıruge tyrysqanymen, sot olardyŋ uäjın qabyldamaǧan.
Sot naqty adamǧa qatysty aitylǧan mūndai mälımdemeler däleldemelermen rastaluy tiıs ekenın atap öttı. Alaida jauapkerler öz sözderınıŋ rastyǧyn däleldei almaǧan. Sonymen qatar, fotosurettı iesınıŋ kelısımınsız jariialau azamattyŋ qūqyqtaryn būzu dep tanylǧan.
Nätijesınde sot jariialanymdardy alyp tastauǧa jäne jalǧan mälımetterdı terıske şyǧaruǧa mındettedı. Sondai-aq ekı jauapkerdıŋ ärqaisysynan moraldyq ziian üşın 300 myŋ teŋgeden öndırıldı. Būǧan qosa, sot şyǧyndaryn öteu jükteldı. Apelliasiialyq jäne kassasiialyq satylar būl şeşımdı özgerıssız qaldyrǧan.
Joǧarǧy Sottyŋ mälımetınşe, osyǧan ūqsas taǧy bır ıs Jambyl oblysynda qaralǧan. Onda Astana tūrǧyny özınıŋ fotosuretı şamamen 1,5 myŋ adam qatysatyn WhatsApp chattarynda rūqsatsyz taratylǧanyn anyqtaǧan. Sot chattaǧy skrinşottardy elektrondyq dälel retınde tanyp, ekı jauapkerden talap qoiuşynyŋ paidasyna moraldyq ziian üşın 20 myŋ teŋgeden öndırgen.
