Britandyq äzılkeş Saşa Baron Koen özınıŋ Borat keiıpkerı üşın qazaqstandyqtardan keşırım sūrady. Būl turaly ol Happy Sad Confused podkastynda aitty, dep habarlaidy «Adyrna» tılşısı.
Ol bastapqyda Borat keiıpkerı Albaniiadan şyqqan boluy kerek ekenın jetkızdı. Alǧaşynda BBC arnasyna arnap äzırlengen keiıpker keiın joba HBO arnasyna auysqan soŋ özgertılgen. Sol kezde komikke amerikalyq körermender az bıletın basqa eldı taŋdau qajet bolǧan. Osylaişa, onyŋ taŋdauy Qazaqstanǧa tüsken.
«Men alǧaş ret Qazaqstan halqynan keşırım sūraǧym keledı. Öitkenı Borattyŋ Qazaqstanǧa eşqandai qatysy joq. Sondyqtan, qazaqstandyqtar, aralaryŋyzda arnaiy tapsyrma alyp, belgılı bır maqsatpen osynda kelgender bolsa, sol missiiadan bas tartularyŋyzdy sūraimyn. Men eşkımge ziian keltırgım kelgen joq. Men sızderdıŋ halqyŋyz ben mädenietterıŋızdı qūrmetteimın. Ötınemın, mūny jeke qabyldamaŋyzdar», – dedı Koen körermender aldynda.
Koen Borat keiıpkerıne qatysty Qazaqstan elşılıgınıŋ reaksiiasyn da eske aldy. Onyŋ aituynşa, el ökılderı keiıpkerdıŋ mūrtyna nazar audaryp, qazaqstandyqtardyŋ syrt kelbetı Boratqa ūqsamaitynyn aitqan.
«Keşırım sūraimyn. Men sızderdıŋ aksentterıŋızdı sala almaimyn, öitkenı qalai söileitınderıŋızdı bılmeimın. Sızder Boratqa mülde ūqsamaisyzdar. Qazaqstan Moŋǧoliiaǧa jaqyn ornalasqan, bıraq sızder mülde basqa halyqsyzdar», – dedı akter.
Koennıŋ sözınşe, Borat turaly äzılder Qazaqstannyŋ özıne emes, adamdardyŋ būl el turaly az bıluıne bailanysty bolǧan. Ol Qazaqstan jönınde mardymdy aqparaty joq adamdarǧa el turaly oidan şyǧarylǧan oqiǧalardy aityp bergen.
Aita keteiık, «Borat» filmı 2006 jyly jaryqqa şyǧyp, onda Qazaqstan men onyŋ tūrǧyndarynyŋ beinelenuıne bailanysty elde synǧa ūşyrady. Filmnıŋ basty keiıpkerı — AQŞ-qa sapar şegıp, türlı absurdty jaǧdailarǧa tap bolatyn oidan şyǧarylǧan qazaqstandyq jurnalist.
