Jazuşy, ädebiet zertteuşısı, abaitanuşy jäne alaştanuşy Tūrsyn Jūrtbai türkı düniesınıŋ ruhani-mädeni damuyna qosqan zor ülesı üşın TÜRKSOI halyqaralyq ūiymynyŋ altyn medalımen marapattaldy. Qazaq ruhaniiaty üşın aituly jaŋalyqty aqyn, jurnalist Ūlyqbek Esdäulet atap öttı, dep habarlaidy “Adyrna”.
Märtebelı marapatty Ankara qalasyndaǧy TÜRKSOI halyqaralyq ūiymynyŋ ştab-päterınde ūiymnyŋ Bas hatşysy Sūltan Äkımūly Raev saltanatty türde tabystady.
Būl marapat – Tūrsyn Jūrtbaidyŋ qazaq ädebietı men tarihyn zertteudegı, Alaş mūrasyn zerdeleudegı jäne Abai şyǧarmaşylyǧyn nasihattaudaǧy köpjyldyq eŋbegıne berılgen joǧary baǧa. Ǧalymnyŋ ǧylymi-zertteu jūmystary men şyǧarmaşylyq ızdenısterı qazaq ruhaniiatynyŋ ǧana emes, tūtas türkı älemınıŋ ortaq mädeni mūrasyn tanuǧa da eleulı üles qosyp keledı.
Tūrsyn Jūrtbai 1951 jyly 15 tamyzda Semei öŋırındegı Abai audanynyŋ Şaǧan auylynda düniege kelgen. Äl-Farabi atyndaǧy Qazaq ūlttyq universitetınıŋ jurnalistika fakultetın tämamdaǧan. Är jyldary «Jetısu» gazetınde, «Bılım jäne eŋbek», «Jūldyz» jurnaldarynda qyzmet atqarǧan.
Qalamgerdıŋ «Dulyǧa», «Qūnanbai», «Ūranym – Alaş!..», «Besıgıŋdı tüze!» syndy eŋbekterı qazaq ädebietı men tarihyndaǧy maŋyzdy zertteuler qatarynan oryn alady. Ol Abaitanu, äuezovtanu jäne alaştanu salalaryna eleulı üles qosqan ǧalym. 2002 jyly professor ǧylymi ataǧyn alǧan. Eŋbekterı älemnıŋ 15 tılıne audarylǧan. Qazaqstan Jazuşylar odaǧynyŋ «Alaş» jäne Iliias Jansügırov atyndaǧy ädebi syilyqtarynyŋ laureaty.
