Foto: Pavlodar oblystyq filarmoniiasy
Norvegiiada ötken auksionnan qazaqtyŋ belgılı küişısı Rüstembek Omarovtyŋ Ekınşı düniejüzılık soǧys kezındegı suretı tabyldy. Tarihi fotoda muzykant nemıs tūtqynynda otyrǧan kezde qoldan jasaǧan dombyrasyn ūstap tūr. Keiın jädıgerdı Pavlodar oblystyq filarmoniiasy satyp aldy, dep habarlaidy “Adyrna” ūlttyq portaly Tengrinews.kz saityna sıltep.
Būl olja 2024 jyly pavlodarlyq «Panfilovşylar» ızdeu jasaǧy men norvegiialyq zertteuşıler bastaǧan jūmystyŋ nätijesınde anyqtalǧan. Mamandar muzykanttyŋ soǧys jyldaryndaǧy ömırıne qatysty būryn belgısız derekterdı jinaǧan.
Zertteuşılerdıŋ mälımetınşe, Rüstembek Omarov Norvegiiadaǧy Ştalag 322 äskeri tūtqyndar lagerınde bolǧan. Tūtqynda jürse de, ol muzykadan qol üzbei, fanera, aǧaş jäne qarmaq jıbınen dombyra jasap, basqa tūtqyndarǧa küi oryndaǧan. Bırde onyŋ Mosart şyǧarmasyn oryndaǧanyn estıgen nemıs ofiserı muzykantqa kömektesıp, azyq-tülık berıp tūrǧan. Omarov özıne berılgen tamaqty basqa tūtqyndarmen bölısken.
Surettı norvegiialyq zertteuşı Tatiana Toresen tapqan. Ol būǧan deiın pavlodarlyqtardyŋ muzykant turaly derektı filmın körgen. Keiın auksionnan keŋestık äskeri tūtqyndardyŋ fotosuretterın baiqap, surettegı adamdy tanyǧan. Norvegiialyq tarihşy Eivin Kosnes fotolardyŋ Ştalag 322 lagerınde tüsırılgenın rastaǧan.
26 qazanda ötken auksionda jetı fotosurettıŋ törteuı satyp alynǧan. Olardyŋ arasynda Rüstembek Omarov beinelengen suret te bar. Keiın ony Pavlodar oblystyq filarmoniiasy ielendı. Jädıgerdıŋ naqty qanşa somaǧa satyp alynǧany jariialanbady. Jaqyn uaqytta norvegiialyq zertteuşıler fotosurettıŋ tüpnūsqasyn filarmoniiaǧa tabystamaq.
Rüstembek Omarovtyŋ qyzy Qarlyǧaş Omarova da surettegı adamdy äkesıne ūqsatqan. Filarmoniia ökılderı fotoda muzykanttyŋ beinelengenın rastaǧanymen, onyŋ naqty qai jerde tüsırılgenın anyqtai almaǧan.
Rüstembek Omarov – Qazaq KSR-ınıŋ halyq ärtısı, küişı, kompozitor jäne dirijer. Ol 1919 jyly Pavlodar öŋırınde düniege kelgen. Soǧysta jaralanyp, Norvegiiada nemıs tūtqynyna tüsken. 1945 jylǧy mūraǧat qūjattary onyŋ azat etılgen keŋestık äskeri tūtqyndar qatarynda bolǧanyn körsetedı.
Elge oralǧan soŋ Qūrmanǧazy atyndaǧy orkestrde öner körsetıp, Almaty konservatoriiasyn bıtırgen. Keiın ūstazdyq qyzmet atqaryp, qazaqtyŋ küi önerın damytuǧa üles qosty. Onyŋ «Jastyq şaq» küiı köptegen orkestrdıŋ repertuaryna engen. Rüstembek Omarov 1988 jyly dünieden öttı.
Aita keteiık, biyl qaŋtarda norvegiialyq ızdeuşıler Ekınşı düniejüzılık soǧys kezınde Norvegiianyŋ soltüstıgındegı nasistık lagerlerde qaza tapqan qazaqstandyq 15 sarbazdyŋ jerlengen oryndaryn anyqtaǧan bolatyn.
