Vise-Prezident Erlan Qarin Almatydaǧy Äbu Nasyr äl-Farabidıŋ filosofiialyq jäne ǧylymi mūrasyna arnalǧan halyqaralyq simpoziumda söilegen sözınde Qazaqstan – köne memleketter men alyp imperiialardyŋ mekenı ǧana emes, bıregei dala örkenietınıŋ de altyn besıgı ekenın atap öttı.
«Ūly Dalada memlekettılıktıŋ tereŋ dästürı qalyptasty. Irı mädenietter men dünietanymdar tüiıstı. Ǧylym men önerdıŋ, ruhaniiat pen oi-pıkırdıŋ özındık mektebı paida boldy. Sol ziiatkerlık äleuettıŋ eŋ jarqyn dälelı – adamzat oiynyŋ damuyna ölşeusız üles qosqan ūly tūlǧalarymyz ekenı anyq. Osy oraida äl-Farabi, Jüsıp Balasaǧūn, Qoja Ahmet Iаsaui, Abai, Şäkärım, Mäşhür Jüsıp siiaqty ǧūlamalardy erekşe atap ötemız. Būl bızdıŋ «Qazaq elı, Ūly Dala – oişyldar mekenı» degen tūjyrymdy oiymyzdy odan ärı quattai tüsedı. Şynynda da, orta ǧasyrlardaǧy Ortalyq Aziia aimaǧy adamzattyŋ örkendeuıne airyqşa üles qosqan ozyq oilardyŋ ordasy bolǧan. Altaidan Atyrauǧa, Arqadan Alatauǧa deiıngı darhan dalada talai ǧūlama ǧalymdar ömır sürgen. Bız – solardyŋ teŋdessız eŋbekterınıŋ jäne danalyq dästürlerınıŋ zaŋdy mūragerımız», – dedı Erlan Qarin.
Eske sala keteiık, halyqaralyq äl-Farabi simpoziumǧa elımızdıŋ jäne şeteldıŋ 150-den astam ǧalymdary, zertteuşılerı, sarapşylary, sondai-aq jetekşı halyqaralyq ūiymdardyŋ ökılderı qatysuda.
