Qazaqstannyŋ hokkei qūramasy Aziia chempionatyndaǧy ekınşı kezdesuınde Qytai komandasyn 5:0 esebımen jeŋdı, dep habarlaidy "Adyrna" ūlttyq portaly.
Oiynnyŋ alǧaşqy kezeŋınde esep aşylǧan joq. Talǧat Jailauovtyŋ şäkırtterı qarsylas qaqpasyna 20 ret soqqy baǧyttaǧanymen, şaiba soǧa almady.
Esep ekınşı kezeŋnıŋ 11-minutynda aşyldy. Saian Daniiar qarsylas komanda qūramynda bır oiynşy kem bolǧan sättı paidalanyp, Qazaqstan qūramasyn alǧa şyǧardy. Araǧa üş minut salyp, ol taǧy bır şaiba soǧyp, dubl avtory atandy.
Üşınşı kezeŋ bastalǧannan keiın 33 sekund ötkende Artur Gatiiatov eseptı 3:0-ge jetkızdı. Kezeŋnıŋ segızınşı minutynda Oskar Iýlbarisov törtınşı şaibany soqty. Al 13-minutta Kirill Nikitin san basymdyǧyn paidalanyp, Qazaqstan qūramasynyŋ besınşı şaibasyn qarsylas qaqpasyna baǧyttady.
Osylaişa, kezdesu 5:0 esebımen Qazaqstan qūramasynyŋ paidasyna aiaqtaldy.
Aita keteiık, Aziia chempionatynda Qazaqstan qūramasynyŋ sapynda «Barys» klubynan tek qaqpaşy Vladislav Nurek öner körsetıp jür. Qalǧan oiynşylar Qazaqstan chempionatyna qatysatyn klubtardan jasaqtalǧan.
Qazaqstan qūramasy 8 qaraşada turnirdegı şeşuşı kezdesuın Oŋtüstık Koreiaǧa qarsy ötkızedı. Biyl qazaqstandyq hokkeişıler byltyr jeŋıp alǧan Aziia chempiony ataǧyn qorǧap jatyr.
