Astanada tıl ǧalymdarymen jäne sala sarapşylarymen kezdesken Vise-Prezident Erlan Qarin Memleket basşysy Qasym-Jomart Toqaevtyŋ tıl normalaryna qatysty bastamasymen ainalysatyn tıl mamandary men sarapşylarǧa maŋyzdy tarihi missiia jüktelıp otyrǧanyn jetkızdı.
– Prezident Qasym-Jomart Kemelūly Toqaev ötken aptada Halyqaralyq «Qazaq tılı» qoǧamynyŋ 10-ynşy qūryltaiyna qatysyp, tıl saladaǧy jyldar boiy jinaqtalǧan problemalardy jüielı türde retke keltıru qajet ekenın aitty. Ol üşın käsıbi tıl mamandarynan, ǧalymdardan, sarapşylardan, jalpy qoǧam ökılderınen arnaiy jūmys tobyn qūrudy tapsyrdy. Mıne, Prezidenttıŋ sol tapsyrmasyna säikes, qazaq tılınıŋ damuyna qatysty asa maŋyzdy ärı jauapty, ūlttyq deŋgeidegı ülken jobany bastaǧaly otyrmyz. Şyn mänınde, būl – tarihi sät. Iаǧni, ǧalymdar men sarapşylar qazaq tılınıŋ damuyn jaŋa deŋgeige köteretın auqymdy reformaǧa kırısedı, – dedı Erlan Qarin.
Vise-Prezidenttıŋ aituynşa, Prezident bastamasymen ainalysatyn sarapşylardyŋ ülken toby jasaqtalady. Onyŋ qūramyna A.Baitūrsynūly atyndaǧy Tıl bılımı institutynyŋ qyzmetkerlerı, joǧary oqu oryndarynyŋ bılıktı tıl mamandary, ǧalymdar, sarapşylar, IT salasynyŋ ökılderı enedı. Tıl normalaryn jetıldıru baǧytyndaǧy negızgı jūmysty osy Sarapşylar toby jürgızedı.
Odan bölek, Prezident tapsyrmasymen Tıl normalaryn jetıldıru jönındegı arnaiy jūmys toby qūrylady. Būl vedomstvoaralyq top jūmysty jalpy üilestıredı jäne ūiymdastyrady, ūsynystar men pıkırlerdı saralap, erejelerdı bekıtedı.
