Memleket basşysy Qasym-Jomart Toqaev qazaq tılınıŋ memlekettık märtebesı, qoǧamdaǧy qoldanysy men bolaşaǧy turaly pıkır bıldırdı, dep habarlaidy "Adyrna".
Prezident ana tılınıŋ el bırlıgın nyǧaitudaǧy, ūlttyq qūndylyqtardy därıpteudegı jäne Qazaqstannyŋ halyqaralyq bedelın arttyrudaǧy maŋyzyn atap öttı.
Memleket basşysynyŋ aituynşa, qazaq tılı – Täuelsızdıktıŋ nyşany, memlekettılıktıŋ basty belgılerınıŋ bırı ärı ūlttyŋ ruhani tıregı. Sondyqtan memlekettık tılge qūrmet körsetu – är azamattyŋ azamattyq jäne adamgerşılık boryşy. Sonymen qatar tıldıŋ abyroiy eldıŋ ekonomikalyq, tehnologiialyq jäne örkeniettık damuymen tyǧyz bailanysty.
«Bız ekonomikasy damyǧan, innovasiiasy men tehnologiiasy üzdık, älem jūrtşylyǧy moiyndaǧan, örkeniettı, myqty memleket bolsaq, qazaq tılı de quatty tıl bolatyny anyq. Memlekettıŋ bedelı artqan saiyn, memlekettık tıldıŋ de abyroiy küşeiedı. Būl – aqiqat», – dedı Prezident Qasym-Jomart Toqaev.
Prezident bılım beru salasynda qazaq tılınıŋ qoldanys aiasy keŋeiıp kele jatqanyn aitty. Onyŋ mälımetınşe, biyl bırınşı synypqa qabyldanǧan oquşylardyŋ 71 paiyzy qazaq synyptaryn taŋdaǧan. Sondai-aq kolledjder men joǧary oqu oryndarynda memlekettık tılde bılım beretın bölımderdıŋ sany artyp keledı.
Mädeniet pen şyǧarmaşylyq industriiada da qazaq tılındegı önımderdıŋ ülesı köbeigen. Byltyr jaryq körgen 6 myŋnan astam kıtaptyŋ 70 paiyzy qazaq tılınde basylǧan. Al biyl Qazaqstanda tüsırılgen 71 filmnıŋ 63-ı ana tılımızde jaryqqa şyqqan.
Memleket basşysy būl körsetkışter qazaq tılıne degen qoǧamdyq sūranystyŋ artyp kele jatqanyn aŋǧartatynyn aityp, jūmysty jüielı türde jalǧastyru qajettıgın jetkızdı.
Sonymen qatar Prezident qazaq tılınıŋ halyqaralyq deŋgeide Qazaqstannyŋ mädenietı men ziiatkerlık äleuetın tanytatyn maŋyzdy qūralǧa ainalyp kele jatqanyna toqtaldy. Ol tarihi tūlǧalar Beibarys sūltan, Abai Qūnanbaiūly, Qanyş Sätbaevpen qatar, bügıngı taŋda älemge tanylyp jürgen Dimaş Qūdaibergen, Samal Esliamova, Bibısara Asaubaeva, sumo baluany Ersın Baltaǧūl (Kimbozan Haruki) jäne Higgsfield AI startapynyŋ jetekşısı Erzat Dulatovty atap öttı.
Prezidenttıŋ pıkırınşe, būl azamattar Qazaqstannyŋ mädenietın, önerın, ruhaniiaty men ziiatkerlık quatyn älemge tanytyp jürgen ruhani elşıler.
Qazaq tılınıŋ tehnologiialyq damu üderısındegı mümkındıkterı de nazardan tys qalǧan joq. Qasym-Jomart Toqaevtyŋ aituynşa, ana tılımız sifrlyq platformalar men jasandy intellekt jüielerınde keŋınen qoldanyla bastady. Mäselen, OpenAI zertteuıne säikes, qazaq tılı soŋǧy üş jylda jasandy intellekt jüielerındegı qoldanysy qarqyndy keŋeigen tılderdıŋ qataryna engen. Al Yandex mälımetınşe, kompaniianyŋ belgılı bır önımın qazaq tılınde paidalanatyn adamdar sany bır jylda 30 paiyzǧa artqan. Google kompaniiasy da ötken jyly qazaq tılın Gemini tıldık modelıne engızgen.
Memleket basşysy ötken kezeŋderde saiasi qysymǧa qaramastan, qazaq tılınıŋ ziialy qauym, tıl mamandary, jurnalister men qarapaiym azamattardyŋ eŋbegı arqasynda saqtalyp, damyǧanyn atap öttı. Sondai-aq memlekettık tıldıŋ bolaşaǧyna qatysty orynsyz kümän men terıs pıkırden aryluǧa şaqyrdy.
«Qazaq tılınıŋ taǧdyry kümändı, belgısız dep zarlai bersek, özge elder men halyqtar bızge qalai qaraidy, qalai senedı?! Ünemı tüŋıle beru oŋ nätije äkelmeidı, mūndai äŋgımenı doǧaratyn kez kelgenıne közımız äbden jettı», – dedı Prezident.
Prezident Toqaev qazaq tılınıŋ barlyq saladaǧy qoldanysyn keŋeitu baǧytyndaǧy jūmysty jalǧastyru maŋyzdy ekenın atap öttı.
«Qazaq elı barda qazaq tılı tūǧyrdan tüspeidı», – dep tüiındedı Memleket basşysy.
