Üşınşı megapolis maŋyndaǧy «Baldäuren» demalys aimaǧynda jas aqyndar arasyndaǧy respublikalyq «Kümıs dombyra» aitysy märesıne jettı. Jyr dodasy biyl qazaqtyŋ ūly aǧartuşysy Abai künıne orailastyrylǧan. Öner saiysyn Şymkent qalasy äkımınıŋ bırınşı orynbasary Şyŋǧys Mūqan bastaǧan körermender tamaşalady.
– Jazba jäne aitysker aqyndar arasyndaǧy «Kümıs qalam» jäne «Kümıs dombyra» baiqaulary biyl ekınşı ret ötude. Byltyr Şymkent qalasynda ötken jyr saiysy biyl Tölebi audanyndaǧy keremet tabiǧat aiasynda ūiymdastyryldy. Qatysqan barlyq aqyndarǧa alǧys aitamyz. Qazaqtyŋ töl önerı aitys – būl är ūltqa būiyrmaǧan öner. Bızdıŋ dana halqymyz ärdaiym ataly sözge toqtaǧan, uäjge jügıngen. Qiynnan qiystyryp, söz tabu, taŋdy taŋǧa ūryp, jyrlau – qazaqtyŋ boiynda ejelden kele jatqan dästür. Qazaqqa qanmen berılgen aitys önerı jasai bersın! Jyr müşäirasyn ūiymdastyruǧa atsalysqan barlyq jandarǧa alǧys aitamyz, – dedı Şyŋǧys Jūmabekūly.
Öner saiysy biyl ekınşı ret Şymkent qalalyq ışkı saiasat basqarmasyna qarasty jastar resurstyq ortalyǧy jäne Qaratau dästürlı öner mektebınıŋ ūiymdastyruymen öttı. Jyr dodasyna elımızdıŋ tükpır-tükpırınen 16 aqyn men 16 aitysker qatysty. Aldymen ırıkteu kezeŋınen sürınbei ötken talantty jastardyŋ öner küngei öŋırıne ǧana emes, elımızge tanymal aqyn Bekarys Şoibekov bastaǧan ädılqazylar alqasy baǧalady. Ädılqazylar qūramynda belgılı aitysker aqyn Bauyrjan Haliolla, Şymkenttegı öner mektebınıŋ direktory Marjan Esjanova, «Altyn dombyra» jüldesınıŋ üş dürkın iegerı Mūhtar Niiazov, Şymkenttegı Äl-Farabi atyndaǧy kıtaphananyŋ direktory Anar Japparqūlova bar.
Sonymen, saiys nätijesı boiynşa türkıstandyq Daniial Bolysbek bas jüldenı jeŋıp aldy. Jeŋımpazǧa kümıspen aptalǧan dombyra tabys etıldı. Bırınşı oryndy Almaty qalasynan kelgen Aiym Asylbekqyzy aldy. Ekı ekınşı oryndy Qyzylordadan kelgen Nūrahmet Mansūrov jäne Türkıstan oblysynyŋ saŋlaǧy Aian Niiazbek ūtyp alsa, ekı üşınşı oryndy şymkenttık jas aqyndar Nūrǧali Änapiia men Jandos Myrzabekov qanjyǧaǧa bailady.
Aita keteiık, «Kümıs qalam» jäne «Kümıs dombyra» saiysy respublikalyq «Altyn qalam» jäne «Altyn dombyra» jyr dodasyna qatysatyn aǧa buyn aqyndardyŋ ızbasarlaryn daiyndau maqsatynda qolǧa alynǧan. Ekı kündık jyr dodasy tabiǧaty äsem orynda öttı. Jas aqyndar, jyr saiysynan bölek, belgılı öner ielerımen jüzdesıp, şeberlık saǧattaryna qatysty.
