Baltaş Tūrsymbaevtyŋ qazasy barşa qazaqqa auyr soqty desek artyq emes. QR Parlamentı Mäjılısınıŋ deputaty Qazybek İsa da estelıkterımen bölısıp, facebook paraqşasyna äserlı jazba qaldyrdy.
Körnektı memleket jäne qoǧam qairatkerı Baltaş Tūrsymbai aǧamyz da dünieden öttı degen suyq habar jettı…
Qazaq saiasatyndaǧy qaraǧaiǧa qarsy bıtken būtaqtai qaisar qairatkerlerdıŋ bıregeiı edı Baltaş aǧamyz!..
Byltyr ǧana küzde mereilı jasy - jemıstı 75 jasymen qūttyqtau jazyp edık…
Memleket jäne qoǧam qairatkerı, auyl şaruaşylyǧynyŋ aituly arysy, saŋlaq saiasatker Baltaş aǧamyzdyŋ zor qarymy men ıskerlık darynyn bilık, iaǧni memleket jetkılıktı paidalanuy kerek edı. Bilıkte jürse de, eldıŋ qamy üşın qasqaiyp tūryp, şyndyqty aityp jürdı. Ädettegıdei ädılın aitqandar sekıldı ornynan ketken soŋ, auylşaruaşylyǧy arpa men bidaidy aiyra almaityn asfaltta ösken kommersanttardyŋ qolyna tüsken edı… Aqyry ne bolǧanyn azyq-tülıktıŋ basym bölıgın şetelden satyp alyp, auadan basqasynyŋ bärı qymbattap, qiyndyq qyspaǧynda otyrǧanymyzǧa qarap bıle berıŋız…
Men qalai parlamentke bardym, aspandaǧy ǧaryşta bır mäsele bolsa da, oǧan jerdegı Qazybek İsa kınälı dep jamandai jöneletın jaldamaly jalaqorlar tobyry paida boldy. Kädımgı attary ştatta tırkelgen, būiryq boiynşa bırınen soŋ bırı şyǧyp tūrady kezekterımen... Byltyr köktemde solardyŋ bırı, Baltaş aǧamyzǧa ötırık “ını” bolyp jürgen bır paqyr kamerasyn alyp jetıp baryp, şatyp-būtyp sūraqtar qoiyp jatty da, ai-şai joq, taqyrypqa qatysy joq men turaly pıkır sūrap, jat ta kep jamandasyn…
Sonda Baltaş aǧamnyŋ sūsty qalpymen arandatuşynyŋ aqymaq sūraǧyn qaitaryp tastap, aqiqatyn aitqan ülken azamattyǧyna, eşqandai būryn aralasyp körmegen men turaly ızgı lebızıne bek riza boldym.
Aqiqatyn aitatyn Ädıldıgı turaly äŋgımenıŋ bärı rastyǧyna kuä boldym.
Baltaş aǧamyzdyŋ “EL men JER” üşın ter men şer tögıp jürgen zor eŋbegın el jaqsy bıledı. Arysynyŋ nar tūlǧasy halqynyŋ esınde erekşe asqaqtai beredı.
Baltaş aǧamyz tereŋnen oilap, alysqa qaraityn, tarihty da ädıl tarazylai bıletın ziialy tūlǧa edı. Anau bır jyldary jergılıktı äkımder Türkıstanǧa Aqsaq Temırdıŋ eskertkışın ornatpaq bolǧanda Baltaş Tūrsymbai: “Altyn Ordanyŋ qūlauyna üles qosqan bileuşınıŋ eskertkışı Altyn Ordanyŋ mūrager elı Türkıstanda tūruǧa laiyq emes”-dep toqtatyp tastaǧan degen habar estıp, razy bolǧan edık.
Baltaş aǧamyzdyŋ otbasyna, tuǧan-tuystaryna, qairatkerın qabyrǧasy qaiysa joqtap jatqan qalyŋ qazaqqa köŋıl aitamyz!
Alla aldynan jarylqasyn!
Peiışte ruhy şalqi bergei!
İmany salamat bolsyn!
Qazybek İSA
