Oralda ant bergenine 10 kún bolǵan sarbaz psıhıkalyq ortalyqtan bir shyqty. Ol 2022 jyldyń maýsym aıynda ásker qataryna shaqyrylǵan, Oraldaǵy 5517 áskerı bólimine Aqtóbe oblysynan kelgen. Bul týraly Zakon.kz jarııalady, dep habarlaıdy “Adyrna” ulttyq portaly.
Ol shilde aıynyń sońynda ant qabyldap, 10 kúnnen keıin oblystyq psıhonevrologııalyq dıspanserge túsken. Sarbazdyń týystary kelesi kúni Oralǵa kelgen.
“Bireýmen tóbelesip qaldy dep oılaımyz. Armanbek ózin ol jerden alyp ketýimizdi ótindi. Buǵan deıin attan qulaǵan, mıy shaıqalǵan. Áskerge alyp ketken kezinde tipti tekserýden de ótpegen eken. Biz ony alyp ketkimiz keledi, onyń qatty soqqyǵa jyǵylǵanyna senemiz, biraq olar sóıleskisi kelmeıdi”, - deıdi jaýyngerdiń týysy Toıbazar Amanbaev.
5517 áskerı bóliminiń komandıri qatardaǵy jaýynger Armanbek Qaıroshtyń 9 tamyzda feldsherlik pýnktke barǵanyn aıtady. Onyń aıtýynsha, jas jigit ózine qol salatyny týraly kópshiliktiń kózinshe málimdegen. Komandıri ony feldsherlik pýnktke ákelip, akt jasatqan, áskerı polıııa denesinde uryp-soǵý belgileriniń joqtyǵyn tirkegen.
Ulttyq ulannyń «Batys» óńirlik qolbasshylyǵynyń basshylyǵy 9 tamyzda saptaý alańynda jigittiń jónsiz minez-qulyq tanyta bastaǵanyn aıtady.
“Biz ony feldsherlik pýnktke oqshaýladyq, ol jerde bizdiń psıholog onymen sóılesip, psıhıatrdyń keńesine júginý qajettigin habarlady. Psıhıatr sarbazǵa «beıimdelýdiń buzylýy» dıagnozyn qoıyp, aýrahanaǵa jatqyzý týraly sheshim qabyldandy. Bul materıal áskerı polıııada tirkeldi, qyzmettik tergeý taǵaıyndaldy, olar fızıkalyq saraptama júrgizdi. Biz ony psıhıatrǵa kórsetýge mindetti boldyq. Óıtkeni biz mundaı jaýapkershilikti moınymyzǵa ala almaımyz. Erteń qarý alyp júrip, atys alańyna baryp, qudaı saqtasyn, ózine birdeńe jasaýy múmkin”, - dedi Ulttyq ulannyń «Batys» óńirlik qolbasshylyǵy qolbasshysynyń orynbasary Baqyt Alazov.
Alaıda ol dıagnozdyń aldyn ala qoıylǵanyn atap ótti. Endi sarbaz eki aı emdeledi, sodan keıin ol áskerı-dárigerlik komıssııaǵa jiberiledi. Komıssııa músheleri onyń qyzmetin jalǵastyra alatynyn nemese jalǵastyra almaıtynyn sheshedi.
Buǵan deıin Ulttyq ulan Oral qalasynda 10 áskerı qyzmetshiniń psıhıkalyq ortalyqqa jatqyzylǵany týraly aqparat joqqa shyǵaryldy. Ortalyqta jalǵyz sarbaz jatqany belgili boldy.
”Adyrna” ulttyq portaly
