Taldyqorǵan qalasyndaǵy Nazarbaev Zııatkerlik mektebiniń jetistikter qazynasy áserli marapattarmen tolyqty.
«Týımaada» halyqaralyq olımpıadasynda ınformatıkadan qola, shahmattan Batys Azııa chempıonynda birinshi oryn, sınhrondy júzýden Nur-Sultan qalalyq ashyq kýbogynda birinshi oryn, aǵylshyn tilinen respýblıkalyq jáne halyqaralyq olımpıadada qola medal, respýblıkalyq esse baıqaýynda Gran-prıdi utyp, taldyqorǵandyq zııatkerler jeńiske jetti.
Nursultan Erlanuly úshin bedeldi «Týımaada» olımpıadasynyń qola júldesi tosyn syı boldy, jas ınformatık kúmispen úmittendi. Soǵan qaramastan, qola aldaǵy jarystarǵa daıyndalýǵa úlken serpin berdi. Búginde Nursultannyń qorjynynda respýblıkada kúmis pen qola, halyqaralyq deńgeıde eki qola medaldary bar.
Daryndy shahmatshy Alıma Ómirserik sátti óner kórsetti. Maldıv araldarynda ótken Batys Azııa chempıonatynyń jeńimpazy atandy. Patshalardyń oıynyna Alımany Balqııa ájesi úıretipti.
Alıma 2018–2022 jyldardaǵy áıelder arasynda Almaty oblysynyń chempıony bolyp keledi. Jarqyn marapattardyń qatarynda: 2018 jylǵy Azııa chempıonatynyń qola medali, 2020 jylǵy Anatolıı Karpov atyndaǵy halyqaralyq kýboktyń altyn medali (Máskeý q.), rapıd jáne blı-2022 boıynsha Qazaqstan Respýblıkasy chempıonatynyń qola medaldary, «Jazǵy kýbok» týrnırinde klassıkalyq shahmattyń altyn medal ıegeri.
— Eki oıynshy, eki strategııa, eki ásker, bir jeńimpaz. Árbir adam shahmat oınaýdy úırene alady, biraq onymen shyndap aınalysatyndar az. Shahmat meniń minezimdi qalyptastyrady, meni aqyldy jáne tózimdi etedi. Bul tańqalarlyq estiledi, biraq bul ras, men jarysqandy, tezirek oılanýdy jáne óz nátıjemdi kórgendi unatamyn», — deıdi Alıma.
Sınhrondy júzýden Amına Janatbek Nur-Sultan ashyq kýbogynyń jeńimpazy atandy. Dýette jas sportshy ekinshi oryn aldy.
Eki kún boıy ótken jarysta elimizdiń ár óńirinen 80-nen astam sportshy baq synady. Amına bolashaqta Qazaqstan chempıony atanǵysy keledi, qazir onyń jetistikter qazynasynda Qazaqstan Respýblıkasy chempıonatynyń qola júldesi bar.
Anar Nurmahan úshin jazǵy demalys nátıjeli boldy. Respýblıkalyq pándik olımpıadada aǵylshyn tili páninen III oryndy jeńip alyp, áriptesi Mádına Túrkebaımen birge irikteý pikirsaıys týrnırinen súrinbeı ótip, sonymen qatar respýblıkalyq ekokonkýrstyń «Úzdik beınerolık» nomınaııasyna ıe boldy.
Toǵjan Shamı respýblıkalyq «Dostyq kópirleri» esse baıqaýynda bas júldeni jeńip aldy.
Bıylǵy oqý jylynda Taldyqorǵan qalasyndaǵy NIS qabyrǵasynan daryndy túlekter bitirip shyqty – bul 99 zııatker, olardyń 21-i elimizdiń eń úzdik ýnıversıteti – Nazarbaev ýnıversıtetine, 21 túlek Amerıkanyń, Ulybrıtanııanyń, Italııanyń, Vengrııanyń, Reseıdiń ýnıversıtetterine oqýǵa tústi.
