Rım papasy elimizge kelip, kedeılik problemasyn tótesinen qoıdy! - Saırov

3375
Adyrna.kz Telegram

"Elimizge kelip, Abaıdy bizge evropalyq qyrdan ashyp bergendeı boldy. Kedeılik problemasyn tótesinen qoıdy". QR Parlamenti Májilisiniń depýtaty Erlan Saırov Rım papasy Franısk týraly pikirin bildirdi, dep jazady "Adyrna" ulttyq portaly.

"Meıirimdi, kirshiksiz jan. Maǵan bul tulǵanyń qarapaıymdylyǵy unaıdy. Bet-álpetinde keremet adamsúıgishtik bar. Elimizge kelip, Abaıdy bizge evropalyq qyrdan ashyp bergendeı boldy. Kedeılik problemasyn tótesinen qoıdy. Álemdegi hımııalyq elementterdiń bári bar eldiń halqy kedeı. Rýhanı álemimizdi baıyta otyryp, ózara kómek, yqpaldastyǵymyzdy arttyrýdyń mańyzy aıtyldy. Qazaqstan mádenıet pen adamdardyń "kezdesetin" orny. Bul rýhanı mıssııa jáne dıplomatııalyq artyqshylyq. Plıýralızm men san salaly pikirsaıys jasaı otyryp, rýhanı tuǵyrymyz, memlekettik birlik tujyrymyn da umytpaý mańyzdy", - dep jazdy depýtat óziniń feısbýk paraqshasynda.

Depýtattyń aıtýynsha, qazir órkenıetterdiń beıbit dıalogyn ornatý óte mańyzdy.

"Keshe Franısk bizdiń elimizge, qasıetti halqymyzǵa, mártebeli qoǵamǵa birlik, yntymaq, yqpaldastyqqa baǵyttalǵan batasyn berip ketti. Kezinde, soǵys kezinde, bir kezdesýde Stalınge "Rım papasy kelispeı jatyr" degen eken. Sonda Stalın "Rım papasynyń qansha dıvızııasy bar?" dep qarsy suraq qoıypty. Al búgin zaman ózgergen, adamzat, álem rýhanı jetispeýshilikti, jahandyq shıelenis máselesin bastan keshirýde. Qazir beıbitshil, órkenıetter dıalogy, ózara tózim máselesin ýaǵyzdaıtyn kúshter óte qajet. Sondyqtan, mártebeli tulǵaǵa "Rahmet, aıtqanyńyz kelsin, Qazaqstanda beıbitshil bolyp, halqymyzdyń birligi artyp, álemde kelisim ornasyn demekpiz, - deıdi Erlan Saırov.

"Adyrna" ulttyq portaly 

Pikirler