Toqaev BUU Bas Assambleıasynyń 77-sessııasyna qatysý úshin Nıý-Iorkke jumys saparymen keldi, dep jazady "Adyrna" ulttyq portaly. Bul týraly Aqordanyń baspasóz qyzmeti habarlady.
Memleket basshysy 19 qyrkúıekte JPMorgan Chase & Co, Citi, Goldman Sachs, NASDAQ sekildi jahandyq qarjy ınstıtýttarynyń basshylarymen kezdesý ótkizedi.
Sonymen qatar Qasym-Jomart Toqaev Boeing, ExxonMobil, General Electrics, Wabtec, Microsoft sııaqty transulttyq kompanııalardyń jetekshilerimen, sondaı-aq sarapshylar tobynyń ókilderimen kezdesedi.
«20 qyrkúıekte Prezıdent BUU Bas Assambleıasynyń Jalpy debatynda sóz sóıleıdi», - delingen habarlamada.
Budan bólek, BUU Bas hatshysymen, Eýropalyq Odaq basshylyǵymen jáne birqatar memleket basshylarymen olardyń ótinishi boıynsha kezdesýler ótkizý josparlanyp otyr.
Qasym-Jomart Toqaev Azyq-túlik qaýipsizdigi jónindegi jahandyq sammıtke de qatysady.
"Adyrna" ulttyq portaly
