Qala künıne orai Almatyda ötken üş kündık ıs-şaranyŋ bırınde Abaidyŋ "Boiy būlǧaŋ" änın şyrqaǧan jas änşıler jūrttyŋ aşuyn tuǧyzdy. Keŋ tynysty Abai änınıŋ oryndaluyna köŋılı tolmaǧandar qatarynda käsıbi öner maitalmandary da bar, dep jazady "Adyrna" ūlttyq portaly.
Qazaqstannyŋ eŋbek sıŋırgen ärtısı Ramazan Stamǧaziev än videosyn öz paraqşasynda bölısıp:
Almatynyŋ qaq ortasynda myna maŋqalar Abai atamyzdyŋ "Boiy būlǧaŋ" änın oryndap sahnaǧa şyqty. Jaŋa Qazaqstannyŋ jūldyzdary. Netken arsyzdyq, osylardy qoldap, qalyŋ eldıŋ aldyna şyǧarǧan kım? Mynalardan ne ūqty eken körgen, estıgen adamdar? Mädeniet basqarmasy, jauapty adamdar qaida? - dep jazdy.Ännıŋ naqyşyna keltırıp oryndalmaǧanyna renış bıldırgenderdıŋ qarasy qalyŋ.
"Beibıt elde sän bölek, bülıngen elde än bölek (Töle bi)", "Qūldyrap bara jatqan qairan uaqyt. Masqara, qaida ketıp baramyz. Bolaşaǧymyz ne bolmaq?", "Bärı satylatyn bolǧan: ar, mansap. Tek halyqtyŋ pıkırın satyp ala almas" dep jazdy oqyrmandar.
Ūqsas jaŋalyqtar
