Qazaq dalasyn jaiau kezıp, egde tartqan şaǧynda erekşe jol-caparǧa şyqqan Särsenbai Ospanūlyna päter berıldı. Būl turaly "Adyrna" ūlttyq portaly jazdy.
Ūlytau oblysynyŋ äkımı Ǧalymjan Qūsmanǧalidıŋ özı qazaq dalasyn aralaǧan aqsaqaldyŋ mereiın ösırıp, meimanasyn tasytqan ıs-şara jaiyn baiandady.
"Bügın jihankez aqsaqaldy oblys ortalyǧynda marapattadyq. Osy jyldyŋ 31 nauryzynda joryǧyn bastaǧan 72 jastaǧy Särsenbai aqsaqal 6 aida 8 myŋdai şaqyrym jerdı jaiau jürıp öttı. Astanadan qasiettı Mekkege deiın 6139 şaqyrym. Demek, eger Särsenbai ata mūsylmandyq paryzyn oryndaimyn dese, onda artyǧymen atqarar edı. Özınıŋ osy joryǧyn soŋǧy 6 jyl boiy oilap jürıptı, josparlapty. Būl da jas buynǧa ülken ülgı. Aldyŋa qoiǧan maqsattan eşqaşan bas tartpa. Qanşa qiyndyq bolsa da, auyr sätter bolsa da, alǧa qarai jüruge talpynu kerek. Sebebı, kez-kelgen adam şeksız mümkındıkterge ie. Ülken kısıge özınıŋ ısıne sai syi-qūrmet körsetıldı. Oblys äkımı Berık Äbdıǧaliūly bastamasymen, Kazakhmys Corporation-nyŋ qoldauymen Jezqazǧan qalasynyŋ ortalyǧynda päter kıltı tapsyryldy. Şapany jabylyp, estelık syilyqtar berıldı. Atamyz jüz jasasyn!", - dep ystyq yqylasyn bıldırdı avtor.
Eskerıŋızge sala keteiık, "Adyrna" ūlttyq portaly Särsenbai aqsaqaldyŋ jankeştı jolsapary jaily būryn da jazǧan edı. Tabiǧatynan şiraq, tyŋ, aqiköz aqsaqal endı Aldyŋǧy Aziia men Europany, AQŞ pen Moŋǧoliiaǧa taban tırep, atalǧan elderdı jaiau aralaudy josparlap otyr.
"Adyrna" ūlttyq portaly
Ūqsas jaŋalyqtar
