Búgin Senat otyrysynda «Raqymshylyq jasaý týraly» zań maquldandy. Buǵan qatysty zań ǵylymdarynyń doktory, professor Esbergen Orazuly pikir bildirdi, dep habarlaıdy "Adyrna" ulttyq portaly.
"Qańtar oqıǵasyna qatysqan azamattarǵa raqymshylyq berý týraly zań – gýmanızmniń bir belgisi. Qazir orta eseppen 1,5 myńnan asa adam osy keshirim zańyna ilinedi deýde. Ol asa aýyr, aýyr jáne jeńil qylmystarǵa qatysty. Jeńil qylmys sanatynda júrgender jóninde isti tipti toqtamǵa alady. Bul Prezıdenttiń Qazaqstan halqyna jasap jatqan keshiriminiń biri. Árıne bul sheshimmen tolyqtaı kelisemiz. Bul álemdik praktıkada bar dúnıe", – dedi ǵalym.
Sondaı-aq qańtar oqıǵasynda kópshiliktiń arańdatýshylardyń, arnaıy qozǵaýshy kúshterdiń qurbany bolǵanyn aıtty.
"Qańtar oqıǵasynda kóp adamdardyń tikeleı qylmys jasaý nıetimen alańǵa shyqqany týraly aıtý qıyn. Sebebi, túrli qozǵaýshy kúshter boldy. Sondyqtan bul másele obektıvti, sýbektıvti jaǵynan tolyq eskerilip, búgin osyndaı sheshim qabyldandy. Prezıdent bul zańǵa qol qoıǵan kúnnen bastap, árbir óńirdegi osy sanattaǵy azamattar raqymshylyqqa ıe bolady", – deıdi Esbergen Orazuly.
Esterińizge sala keteıik, osyǵan deıin senat otyrysynda bul zań jobasy Prezıdent Qasym-Jomart Toqaevtyń 2022 jylǵy 1 qyrkúıektegi «Ádiletti memleket. Birtutas ult. Berekeli qoǵam» atty Qazaqstan halqyna Joldaýyndaǵy izgilik ıdeıasynyń negizinde ıgi nıettilik tanytyp, qańtar oqıǵalaryna qatysýshylarǵa bir rettik raqymshylyq jasaý týraly tapsyrmasyn iske asyrý maqsatynda ázirlengenin aıtqan.
"Adyrna" ulttyq portaly
