Qazaqstandaǵy barlyq adamdar qazaqsha erkin sóılesin! - Vladıslav Ten

8181
Adyrna.kz Telegram

"Qazaqstandaǵy barlyq adamdar qazaqsha erkin sóıleı bilse eken". Bul pikirdi memlekettik tildi erkin meńgerip, qazaq tili onlaın mektebiniń negizin qalaǵan til janashyry  Vladıslav Ten óziniń feısbýk paraqshasynda qaldyrdy, dep jazady "Adyrna" ulttyq portaly. 

"Bizdiń ata-babalarymyz 1937 jyly deportaııaǵa ushyrap Qazaq jerine eriksiz kelip túskende qazaqtar olarmen sońǵy nanymen bólisip, ajaldan qutqaryp, kómek bergeni úshin koreı halqynan alǵys bildiremin. Sol kezde qazaq halqy ata-babalarymyzǵa qol ushyn bermegende men de, meniń kóptegen týys-týystarym da bul dúnıege kelmes edik jáne osy alǵysymdy dál qazir jazyp otyrmas edim. Qazaq jeri koreıler úshin kıeli ári qasıetti jer bolyp tabylady. Men Ózbekstanda týǵanmyn. Meniń Otanym, týǵan jerim - Ózbekstan. Qazaqstanǵa ata-anamnyń jalǵyz uly bolyp, osy jerde birge turaıyq degen shaqyrýymen kelip qazaq tilin bilýge degen qyzyǵýshylyǵym artyp bar yntammen oqyp úırene bastadym. Maǵan tek qana til emes, jalpy qazaq halqynyń ózi, salt-dástúri unaı bastady, maqaldaryn túsine bastadym. Sodan ózime: "Nege men qazaq tilin damytý úshin osynsha janymdy berip jumys jasap jatyrmyn?"- dep suraq qoıdym. Sol suraǵyma ózim jaýap tapqan sııaqtymyn. Meniń oıymsha, Alla taǵala meni Qazaqstanǵa ata-babalarymnyń atynan alǵys aıtý úshin jibergen sııaqty. Sol qıyn kezde meniń ata-babama kómek bergen qazaq halqyna degen qurmetimdi árqashan da alǵa qoıamyn. Qazaq halqynyń eń jaqsy qasıetteriniń biri bul osy jerde turyp jatqan árbir halyqty qurmetteı biledi. Mysaly, bizdi, koreı halqyn, únemi “eńbekkor “ dep ataıdy. Bul bizdi joǵary baǵalaı bilgeni dep eseptep, ári qaraı Qazaq jeri úshin, onyń jan-jaqty damýyna jan aıamaı, eńbek etýge daıynmyn. Sondyqtan óz basym qazir qazaq tilin damytýda jumys isteı bastadym. Al meniń maqsatym jáne armanym Qazaqstandaǵy barlyq adamdardyń qazaqsha erkin sóıleı bilýi!", - deıdi qazaqstandyqtarǵa qazaq tilin úıretip júrgen Vladıslav Ten. 

"Adyrna" ulttyq portaly 

Pikirler