Prezıdent Qasym-Jomart Toqaev kásipkerlikti jan-jaqty qoldaý úshin tıimdi tásilderdi usynǵan bolatyn. Atap aıtqanda, granttar, shaǵyn jáne jeńildetilgen nesıeler berilýde, dep jazdy "Adyrna" tilshisi.
Memleket basshysynyń bastamasynyń aıasynda, Almaty qalasynda qarqyndy jumystar atqarylyp, jeke kásip bastaımyn degen jurtqa dańǵyl jol ashylyp jatyr. Oǵan dálel, 1600-ge jýyq almatylyqtyń qaıtarymsyz grant alyp, óz kásibin bastaýy.
Memleketten qoldaý taýyp, jeke ist bastaǵandardyń biri, almatylyq 29 jastaǵy Dınara Ańsatbaeva - 4 balanyń anasy. Eń úlkeni 5 jasta bolsa, eń kishisi bir jarymda. 6 jyldan beri bala kútimine baılanysty úıde otyrǵan ol tigingishi mamandyǵyn bitirgen. Biraq súıikti isimen bar bolǵany bir jyl ǵana aınalysypty. Degenmen úıdegi tirlikten qoly qalt ete qalsa, bos ýaqytyn osy iske arnaıdy. Al qaıtarymsyz grant kásipti dóńgeletip áketýge zor múmkindik bergen. Ol qujat tapsyrǵan soń, bar bolǵany 2 aptanyń ishinde qarajat qaltasyna túskenin aıtady. Kópten beri armandap júrgen jańa tigin mashınalaryn satyp aldy.
«Men oǵan keste tigetin mashınany aldym. Sosyn kerekti qural-jabdyqtar satyp aldym. Mashınanyń arnaıy baǵdarlamasyn oqydym. Ol kez kelgen sózdi kez kelgen zatqa tigip beredi», – dedi kópbalaly ana Dınara Ańsatbaeva.
Óz isine uqypty kelinshektiń búginde turaqty klıentteri de bar. Kópbalaly ana tutynýshylardyń senimin aqtaǵany úshin jıi tapsyrys túsetinin aıtady. Óıtkeni ol tiginniń túr-túrin biledi. Jalpy Jetisý aýdanynda Dınara sekildi bıyl súıikti isin kásipke aınaldyrǵan 101 adam bar. Olardyń basym bóligi táttiler pisiretin shaǵyn kondıterlik eh ashsa, birazy ateleni iske qosqan.
«Qyrkúıek aıynda 72 adam alǵan. Olar isterin bastap ketip jatyr. Al qalǵany 30 shaqty adam. Olar jumysyn júrgizip jatyr. Ony da tekseretin, qandaı da kómekter kerek bolatyn bolsa, jumyspen qamtý ortalyǵy aınalysady», – dedi Jetisý aýdany ákiminiń orynbasary Danııar Álkebaıuly.
Qaıtarymsyz grant alý múmkindigine elimizdegi kásipkerlikti damytý ulttyq jobasy aıasynda qol jetip otyr. Ol jastarǵa, kópbalaly analarǵa, az qamtylǵan, múgedek bala asyrap otyrǵan otbasylarǵa ózderin turaqty tabyspen qamtamasyz etý úshin kómek retinde beriledi. Qaıtarymsyz grant kólemi - 400 aılyq eseptik kórsetkish, ıaǵnı 1 mln 225 myń teńge. Kapıtaldy jańa bıznesti bastaýǵa nemese bar kásipti damytýǵa jumsaýǵa bolady. Grant qarajaty nesıe óteýge, jer telimin satyp alýǵa berilmeıdi.
Aıta keteıik, Almatyda bıyl 1600-ge jýyq adam qaıtarymsyz grant alyp, óz kásibin bastady. Al búginnen bastap «Bıznes bastaý» baǵdarlamasy arqyly bilimin jetildirýge 4700-den asa adam ynta bildirdi.
