Kópten beri kórinbeı ketken belgili dástúrli ánshi, ónertanýshy Erlan Tóleýtaı óziniń fb paraqshasynda áserli jazba jarııalap, 19 jeltoqsan Qaraǵandy qalasynda jeke shyǵarmashylyq kesh ótkizetinin habarlap, súıinshi jańalyqpen bólisti. Bul týraly "Adyrna" ulttyq portaly jazady.
Rýhanııat janashyry kórinbeı ketýiniń sebebin túsindirip, qazir nemen aınalysyp júrgenin aıtty.
"Men FB-te bolmaǵaly qaı zaman?! Eń keıingi jazbamdy 6 qazan kúni jarııalappyn. Sodan beri eki jarym aıdaı ýaqyt ótipti. Jalpy, bıyl ásirese sońǵy jarty jyldyqta FB betinde óndirtip eshteńe jarııalaı qoıǵan joqpyn. Sebebi bıyl jumys kóp boldy. Kitap jazdym kúzge deıin, sosyn kúz boıy Uıǵyr aýdanynda túsirilimde boldym. Kınonyń basqa da bastan asyp jatqan jumystary bar degendeı. Sodan men FB-tan sýyp bar qalyppyn.... Áleýmettik jeliden qol úzgen jaqsy – bir jaǵynan.. Shyǵarmashyshylyq, basqa da jumystaryń óndıdi. Ekinshi jaǵy bar – qoǵamda bolyp jatqan oqıǵalardan qol úzip qalasyń. Jazba jarııalap, pikir bildirmek túgili tipti eshkimniń qýanyshyna, qyzyǵyna ortaqtasa almaı qaldym. Ǵafý etersizder, dostar! Budan bylaı sırek bolsa da shyǵyp turamyn endi. Óıtkeni jyl boıy jıǵan qorjynym toq. Sony sizdermen bólispek oıym bar. Bildiretin pikir de jeterlik", - dep jazdy Erlan Tóleýtaı.
Sonaý 1990 jyldardyń sońynan beri Qaraǵandydaǵy ónerli jastardyń altyn qazyǵy bolyp, kúni búginge deıin rýhanııatqa aıryqsha úles qosyp kele jatqan Erlan Tóleýtaı óziniń týǵan oblysynda tuńǵysh ret "Atyńnan aınalaıyn, Qaraǵandy" atty jeke shyǵarmashylyq keshiniń ótkeli jatqanyn aıtyp, rızashylyǵyn jetkizdi.
"Sonyń biri Qaraǵandyda shyǵarmashylyq keshim ótkeli jatyr. Týǵan oblysymda tuńǵysh ret jáne oblystyq ákimshilik pen oblystyq mádenıet basqarmasynyń muryndyq bolýymen. Bul men úshin zor qýanysh. Sol úshin búgin Qaraǵandyǵa keldim. Daıyndyq jumystaryna qatystym. Oblystyq Mádenıet basqarmasynda keshime baılanysty ázirlik jumystary qyzý júrip jatyr eken. Toǵaıyp, marqaıyp qaldym. Degenmen ishteı mazasyzdaný bar. Sebebi 2017 jyldan beri úlken sahnaǵa shyqqan joqpyn. Ne de bolsa – táýekel dep shıryǵýdamyn. Qysqasy, erteńgi bolatyn shyǵarmashylyq keshime kelińizder, qaraǵandylyqtar, astanalyqtar! Shyǵarmashylyq keshime ónerdegi jaqyn dostarym qatysady jáne ol dostarym tek meniń ánderimdi shyrqamaq. Atap aıtqanda: Ramazan Stamǵazıev, Merýert Túsipbaev, Erkin Shúkiman, Roza Álqoja, Erlan Qujımanov, Seıil Aıaǵanov sekildi saıypqyrandar óner kórsetpek. Kelińizder, tamashalańyzdar qadirmendi qaraǵandylyqtar men qala qonaqtary!",- deıdi ónertanýshy.
"Adyrna" ulttyq portaly
