Almatydaǵy №132 gımnazııasyndaǵy qazaqsha jazýlar jetimniń kúıin keship tur. Al mektep dırektory orys tilin qoldap, tipti, Qazaqstannyń tarıhyn 70-jyldyq dep otyr. Bul týraly áleýmettik jeli belsendisi Darhan Ardaquly TıkTok jelisine birneshe vıdeo jarııalady, dep habarlaıdy “Adyrna” ulttyq portaly.
Alǵashqy vıdeoda mektep ujymy oqýshylardy “Rossııa nam 30 let” atty fılmge aparǵany aıtylady.
“Bul mektep oqýshylarǵa orystyń saıasatyn júrgizip otyr. Bul ne masqara! Táýelsiz elge orystyń saıasatyn júrgizý degen bassyzdyq!”, - dedi vıdeoda belsendi.
Belsendi 132 gımnazııanyń dırektory Abdımanapova Qarlyǵashtan Reseı propagandasyn nasıhattaıtyn fılmge ne úshin aparǵandaryn surady. Al dırektor “siz kimsiz mennen suraq alatyn” dep ashýlanyp, fılmde Reseı propagandasy joq ekenin aıtyp aqtaldy.
“20 oqýshy bardy. Fılmniń uıymdastyrýshylary kásiptik baǵdar boıynsha fılm dep aqparat berdi. Biz Reseı saıasatyn júrgizip jatqan joqpyz…
Qatelik boldy, men ony moıyndaımyn. Bilim basqarmasynan qatań sógis aldym. Oǵan baılanysty men óz jumysymdy basqasha uıymdastyratyn boldym. Men balalarymdy eshqaıda shyǵarmaımyn jáne mektepke eshkimdi kirgizbeımin. Óıtkeni, barlyq ótkiziletin is-sharanyń mazmunyna qarap jatyrmyz. Mektepte ótip jatqan is-sharalardyń barlyǵy orys tili toby bolsyn, qazaq tili toby bolsyn, tek qazaqsha ótedi”, -dedi dırektor.
Sondaı-aq, mektep dırektory “Qazaqstannyń 70 jyldyq tarıhy bar” dep kóptiń ashýyn týǵyzdy.
“70 jyldyq tarıhymyz bar ǵoı. Biz mektepte oqyp jatqan kezde, bizge “adam bolǵyń kelse, oryssha oqy” dep aıtty”, - dedi dırektor Qarlyǵash Aqanqyzy.
