Qazaqstan Premer-Ministrı Älihan Smaiylov Almatyda ötıp jatqan EÜAK otyrysy aiasynda Resei Ükımetınıŋ töraǧasy Mihail Mişustinmen kezdestı, dep habarlaidy «Adyrna» tılşısı.
Älihan Smaiylov QR men RF arasynda ekonomikalyq kooperasiia qarqyndy damyp, özara sauda-sattyq deŋgeiı arta tüskenın jäne bırlesken jobalar ıske asyrylyp jatqanyn aitty. Būl rette ekı el köşbasşylary arasyndaǧy belsendı saiasi dialogtyŋ Qazaqstan-Resei ärıptestıgınıŋ barlyq salalarynda joǧary qarqyndy qamtamasyz etıp otyrǧany atap ötıldı.
Kezdesude ötken jyldyŋ 11 aiynda özara tauar ainalymy 2021 jyldyŋ säikes kezeŋımen salystyrǧanda aitarlyqtai öskenı aityldy. Sonymen qatar önerkäsıptık kooperasiianyŋ damu qarqyny jaqsy, onyŋ aiasynda jalpy qūny $1 mlrd-qa juyq 26 bırlesken joba ıske asyryldy. Būǧan qosa qūny şamamen $23 mlrd bolatyn 84 ırı joba ıske asyryluda jäne pysyqtalu satysynda. Osy jobalardyŋ aiasynda 24 myŋ jūmys orny qūrylady dep kütılude.
«Būl Qazaqstan-Resei yntymaqtastyǧynyŋ zor äleuetın körsetedı, bız ony belsendı türde qoldap, damytuymyz qajet», — dedı Älihan Smaiylov.Öz tarapynan Mihail Mişustin ekı el ükımetterı tūraqty bailanysta ekenın jäne özara memleketaralyq bailanystardyŋ asa maŋyzdy mındetterın uaqytyly şeşıp otyrǧanyn atap öttı.
«Negızgı basymdyqtarymyzdyŋ bırı – Qazaqstanmen qarym-qatynasty ärı qarai nyǧaita tüsu. Bızdıŋ yntymaqtastyǧymyz dostyq, strategiialyq serıktestık jäne odaqtastyq prinsipterıne negızdelgen. Ekı el arasynda özara sauda-sattyq tabysty damyp keledı. Būl rette bız önerkäsıp, maşina jasau, energetika, kölık jäne basqa da salalarda jaŋa öndırıstık tızbekter qūrudy jedeldetu maŋyzdy dep sanaimyz», — dedı Mihail Mişustin.
