Ūlttyq sanasy myǧym, jazu maşyǧy şymyr, qazaq taǧdyryna qatysty taqyryptarda tolǧanyp, el men jerdıŋ müddesı jolynda janyn beretın jurnalist Dina İmambai naǧyz qazaqtardyŋ joiyluyn satylai jüzege asyrǧandardy äşkere ettı. Onyŋ aituynşa, naǧyz, saf ärı dübäralyqtan ada qazaqtar joiyludyŋ az-aq aldynda tūr. Terıs saiasattyŋ naqty körınısı - bügıngı Almatyda ötken halyqaralyq “Digital Almaty 2023” dep jazdy avtor. Esterıŋızge sala keteiık, bügın forumda qazaq tıldılerdıŋ şettetılgenı üşın ülken dau tuǧan bolatyn. Būl jaidy "Adyrna" ūlttyq portaly baiandaidy.
Jurnalist Dana İmambai qazaq tılı men sapaly qazaqtardyŋ taǧdyryna balta şabu saiasatynyŋ tereŋnen oilastyrylǧanyn, mūndai zändem ärekettıŋ bastauy tym ärıde jatqanyn aitady.
"Esterıŋızde bolsa 2009-2010 jyldary "Qazaqstandyq ūlt" turaly doktrina qabyldanatyn bolyp, oǧan ūltşyldar qarsy şyǧyp, Mūhtar Şahanov aştyq jariialaimyn dep, ony bilık raiynan qaitaryp, aqyry doktrinadaǧy "qazaqstandyq ūlt" degen sözdı özgertıp qabyldaǧan bolatyn. Aidos Sarym men Dos Köşım, taǧy basqa saiasattanuşylar “bärı keremet bolady, 2020-jylǧa qarai tılımız tūǧyryna qonady” dep sendırgen sol kezde.
Sol doktrinada aitylǧan "qazaqstandyq ūlt" qalyptasyp, jaŋa subetnos paida boldy, negızı. Būǧan keşegı didjital-forum juan nükte qoidy. Türı qazaq, aty-jönı qazaq, bıraq qazaq tılın bılmeitın nemese şala bıletın jäne ony bıludı maŋyzdy sanamaityn ülken-kışısı aralas qazaqstandyq ūlt qalyptasyp, sahnaǧa şyqty.
Basqa nebır jaqsy baǧdarlamalar oryndalmasa da osy doktrina aiaǧyna deiın jetkızıldı, bır ǧajaby.Ūlttyq bıregeilıktı qalyptastyru degenımız azamattyq bıregeilık bolyp şyqty.Qazaqtyŋ ūlttyq ideiasynyŋ ornyna "qazaqstandyq ūlt" ideiasy jürgızıldı.Qazaq ūlty basqa ūlt ökılderın assimiliasiialauşy bola almady.Qazaq tılı bırıktıruşı faktor bola almady, bolǧyzbady.Memlekettık tıl märtebesı ıste emes, söz jüzınde.Būl tıl "kedeilerdıŋ, artta qalǧandardyŋ" tılı sanalatyn deŋgeige jettık" - dep kesıp aitty jurnalist.
Sonymen qatar, Dina İmambai qazaqty tömendetu men şettetudıŋ "mınsız" äreketterın jıktep, taza, asyl qandy, böten bıtımmen "bylǧanbaǧan" qazaqtardyŋ “saiasi sebeptermen” siregenın söz etedı.
- Salt-dästür Nauryz meiramynda körsetıletın ekzotikaǧa ainaldy.Üilenu, taǧy basqa toilarymyz zamanauilandy.Auyl da būrynǧy qazaqtyŋ auyly emes.Aitys improvizasiia emes, şouǧa ainaldy.Dästürlı än-küi dästürlı änşıler men küişılerge ǧana kerek bolyp qaldy.Endı naǧyz qazaqtar etnografiialyq azşylyqqa ainaludyŋ tabaldyryǧynda tūr.Sonymen, jaŋa subetnostyŋ töŋıregıne şoǧyrlanaiyq deimız be, ne deimız. Bır saiasatker aitqandai, "kazahoiazychnym net mesta v politike". Saiasatta ǧana emes, barlyq salada solai ǧoi, rasynda, - dep kürsındı aqyl közınıŋ audany keŋ azamat, halqynyŋ jankeştı jurnalisı Dina İmambai.
Esterıŋızge sala keteiık, bügın Almatyda ötken halyqaralyq forumda qazaq tılınıŋ tūǧyryn şaiqamaq bolǧandardyŋ äreketınen şu köterılıp, qoǧam dür sılkındı. Forum törındegıderdıŋ qazaqşa söileudı “ar” sanaitynyn joba qonaǧy aşyq aityp, “aitaqşylardy” (spiker) düiım jūrttyŋ közınşe oŋdyrmai synap tastaǧan edı.
"Adyrna" ūlttyq portaly
