Qazaqstandyq dziudoşy Äigerım Äbılqadırova Parijde ötıp jatqan "Ülken dulyǧa" turnirı kezınde qarsylasyn nege tıstep alǧanyn aitty. Būl turaly ol Instagram jelısınde aitty, dep habarlaidy “Adyrna” ūlttyq portaly.
Qazaqstandyq qyz 52 kelıge deiıngı salmaq därejesınde turnirdıŋ alǧaşqy kezdesuınde belgiialyq Şarlin van Snikke ese jıbergenımen, qarsylasyn tıstep alǧan.
"Synap jatqandarǧa jauap bergım keledı. Keşe men Parijdegı "Ülken dulyǧa" turnirınde belgiialyq sportşymen jekpe-jekke şyqtym. Ol şyntaqty auyrtu täsılıne köştı. Men berıluge belgı berdım, bıraq soǧan qaramastan belgiialyq sportşy qolymdy syndyrudy jalǧastyrdy.
Şyntaǧymnyŋ syrt etkenın estıgennen keiın, men ony avtomat türde tıstep aldym, basqa amalym bolmady. Osynyŋ bärıne qosa, töreşı mülde jauap qatpai, jekpe-jektı toqtatpady.
Aitpaqşy, maǧan jaǧymsyz sözder jazyp jatqan erkekter... Eger sondai batyr bolsaŋyz, maǧan öz nömırlerıŋızdı jazyp, oiyŋyzdaǧyny betıme aityp körıŋız, eger batyl bolsaŋyz, ärine", - dedı sportşy.
